Клуб А Серия чемпионлигини қўлга киритганига 6 йил, ЕЧЛ ғолибига айланганига эса 9 йил вақт ўтибди. Келинг, ўша 9 йил олдин Чемпионлар лигасини боши узра баланд кўтарган "Милан"нинг асосий юлдуз футболчилари бугунги кунда нималар билан банд эканликларига қизиқиб кўрамиз.

Бошладик!

Дарвозабон

Дида (Бразилия)

Ёши: 43

ЕЧЛдаги ўйинлари: 11

Бугунги кунда у Хитойнинг "Шеньчжень" клубида дарвозабонлар мураббийи сифатида Кларенс Зеедорфга ёрдам бермоқда.

Ҳимоячилар

Кафу (Бразилия)

Ёши: 46

ЕЧЛдаги ўйинлари: 6

Чемпионлар лигасида ғолиб бўлганидан сўнг, орадан икки йил ўтиб фаолиятини якунлаган. Орада Бразилия ва Италиядаги спорт тадбирларида кўриниш бериб турди. Бугунги кунда "SKY" телеканали экспертларидан бири ҳисобланади.

Паоло Мальдини (Италия)

Ёши: 48

ЕЧЛдаги ўйинлари: 9

2009 йилда футбол билан хайрлашган. А Серияда ўйин ўтказиш бўйича рекордчи (647). "Милан" сафида 902 та ўйинда майдонга тушган. 2015 йилда АҚШнинг "Майами" клуби эгасига айланган. Жамоа бугунги кунда МЛС йўлланмасини қўлга киритишга астойдил бел боғлаган.

Кахабер Каладзе (Грузия)

Ёши: 38

ЕЧЛдаги ўйинлари: 7

2010 йилда А Серия чемпионига айланганидан сўнг "Женоа" сафига бориб қўшилганди. Кейинчалик туппа-тузук сиёсатчига айланди-қолди! 2012 йилда Грузиянинг энергетика ва табиий ресурслар вазири этиб тайинланди.

Алессандро Неста (Италия)

Ёши: 40

ЕЧЛдаги ўйинлари: 8

2012 йилда "Милан"дан кетганидан сўнг, аввалига Канадада, кейин Ҳиндистонда ўйнади. Бугунги кунда дўсти Мальдинининг "Майами" клубида бош мураббий сифатида ишламоқда.

Марек Янкуловски (Чехия)

Ёши: 39

ЕЧЛдаги ўйинлари: 13

Миланликлар сафини 2011 йилда тарк этган. Кейинчалик ўз ватанида - "Баник" жамоасида ўйнаб, фаолиятини ўша ерда якунлаган. Бугун ора-орада Италия ТВсида кўриниб қолади.

Ярим ҳимоячилар

Женаро Гаттузо (Италия)

Ёши: 38

ЕЧЛдаги ўйинлари: 11

"Милан"дан сўнг Швейцариянинг "Сьон" жамоасида ўйновчи мураббий сифатида фаолият олиб борган. Кейинроқ, "Палермо"да мураббий сифатида ишлаган. Бугунги кунда эса "Пиза"ни А Серияга олиб чиқишга ваъда берган мураббий ҳисобланади.

Кларенс Зеедорф (Голландия)

Ёши: 40

ЕЧЛдаги ўйинлари (гол): 12 (2)

Миланликлар сафида 300 та расмий ўйин ўтказган. 2012 йилда эса 2 йилга Бразилиянинг "Ботафаго" жамоасига жўнаб кетади. 2014 йилда эса жонажон жамоасига бош мураббий сифатида қайтади. Кейин эса истеъфо... Бугунги кунда Хитойнинг "Шеньчжень" жамоаси бош мураббийи сифатида ишламоқда.

Йоанн Гуркюфф (Франция)

Ёши: 30

ЕЧЛдаги ўйинлари: 8 (1)

Гуркюфф 19 ёшидаёқ ЕЧЛ совринини боши узра баланд кўтарган. Афсуски, ўшанда у фаолиятидаги энг йирик совринини қўлга киритиб бўлган экан. 2008 йилда "Милан"дан кетиб, "Бордо" сафига бориб қўшилади. Бугунги кунда эса отаси бош мураббийлик қилаётган "Ренн" футболчиси ҳисобланади.

Андреа Пирло (Италия)

Ёши: 37

ЕЧЛдаги ўйинлари: 12 (1)

2011 йилда "Милан"дан кетганидан сўнг "Ювентус" сафига бориб қўшилади. 2015 йилда "Юве" билан биргаликда ЕЧЛ финали бой берилади ва у АҚШга жўнаб кетади. "Нью-Йорк Сити" футболчиси бугунги кунда футболчилик фаолиятини якунлаш ҳақида ўйламоқда.

Массимо Амброзини (Италия)

Ёши: 39

ЕЧЛдаги ўйинлари: 10

2013 йилда "Фиорентина" футболчисига айланган. Бугунги кунда телевиденияда эксперт сифатида ишлаётган Массимо мураббий сифатида ўзини синаб кўришни истамоқда.

Кака (Бразилия)

Ёши: 34

ЕЧЛдаги ўйинлари: 13 (10)

Бир неча маротаба дунёнинг энг кучли футболчилари учлигига киритилган футболчи "Милан"ни кўзда ёш билан тарк этганди. Мадридда эса уни кетма-кет жароҳатлар ва Моуриньо билан тушунмовчиликлар кутаётганди. 2013 йилда яна "Милан"га қайтиб келади. Афсуски, ушбу қайтиш футболчига омад келтиргани йўқ. Бугунги кунда МЛСнинг "Орландо Сити" жамоаси футболчиси ва лиганинг энг кўп маош олувчи ўйинчиси ҳисобланади. У терма жамоаси билан Россияда бўлиб ўтадиган ЖЧ-2018 га боришни орзу қилмоқда.

Ҳужумчилар

Филиппо Инзаги (Италия)

Ёши: 43

ЕЧЛдаги ўйинлари: 10 (4)

2012 йилгача "Милан"да ўйнаган Пиппо Осиё ёки АҚШга бориб ўтирмади ва фаолиятини якунлаб қўяқолди. Орада "Милан" бош мураббийи сифатида ҳам ишлади. Бугунги кунда "Венеция" жамоаси устози ҳисобланади.

Альберто Жилардино (Италия)

Ёши: 34

ЕЧЛдаги ўйинлари: 9 (2)

"Милан"даги "олтин давр"дан сўнг терма жамоаси сафида жаҳон чемпионига айланади. 8 йил ичида 7 марта жамоасини ўзгартирган. Орада Хитой томонларни айланиб келишга ҳам улгурган футболчи бугунги кунда "Эмполи" жамоасининг асосий юлдузи саналади.

Бош мураббий

Карло Анчелотти (Италия)

Ёши: 57

Карло ота Италиядан сўнг Англия, Франция ва Испания чемпионатларида кетма-кет турли совринларни қўлга киритди. Бугунги кунда эса Германиянинг "Бавария" жамоаси бош мураббийи эканлигидан барчанинг хабари бор.

sports.ru сайти асосида Азиз Тўхтамуродов тайёрлади

Сўнгги қаҳрамонлар. Афсонавий "Милан" ҳозир қаерда?