- Салом, Станислав Саламович. Ўзбекистон миллий терма жамоаси вазияти ҳақида фикрингизни билмоқчи эдик. Ҳозирда ЎФА МТЖ бош мураббийини алмаштириш масаласини кўриб чиқмоқда. Номзодлар орасида турли мутахассислар тилга олинди: аввалига Йоахим Лёв ҳақида маълумот берилди, бироқ немис матбуоти Лёв таклифни рад этгани ҳақида ёзди. Кейинчалик португалиялик мураббий Паулу Бенту бўлди номзод сифатида эътироф этилди. Бенту музокаралар учун Тошкентга ташриф буюрди. Сизнингча, Жаҳон чемпионатига бир йилдан камроқ вақт қолганида мураббийни алмаштириш тўғрими? Бу жамоага фойда келтириши мумкинми ёки бундай қадам кўпроқ хавф туғдирадими?

- Ҳайронман очиғи, чунки бу ҳақда иккинчи марта эшитяпман. Мураббийни алмаштириш ғоясининг сабаби ва бу қанчалик ҳақиқатлигини билмайман. Ишончим комилки, терма жамоани Олимпиадага ва Жаҳон чемпионатига олиб чиққан Кападзе жамоани хотиржамлик билан мундиалга тайёрлашга лойиқ. Маълумки, Ўзбекистон ҳеч қачон бундай юқори даражадаги мусобақада ўйнамаган ва Кападзеда ҳам бундай тажриба йўқ. Жамоани бу даражага олиб чиқишнинг ўзи катта ютуқ. Мен кузатганимда, жамоа бошқарувчан, ҳужумкор футбол намойиш эта оладиган ва нима қилишни биладиган жамоа эди. Шу боис, узоқдан туриб раҳбариятга маслаҳат берадиган инсон эмасман. Табиийки, улар вазиятга анча чуқур ва тизимли ёндашишади. Менимча, йўлланмани қўлга киритган одам жамоани охиригача бошқариши керак.

Чет эллик мураббийлар масаласига келсак, бу жуда мураккаб масала. Тушунтириб бераман, чунки яқинда ўзим Қозоғистонда ишлаганман, у ерда ҳамма мени тушунарди. Биз рус тилида гаплашардик, ҳамма мени тушунарди. Лекин барибир қийинчиликлар бўлди, чунки менталитетни, жамоани тушуниш, кимнинг ким эканлигини аниқлаш керак эди. Ҳатто собиқ иттифоқдош республикада ишлаётиб, бир тилда гаплашсангиз ҳам, баъзи нарсаларни бошиданоқ тушуниш қийин бўлган ҳолатлар кўп учрайди. Менда деярли вақт бўлмади, Норвегия терма жамоасига қарши ўйиндан атиги икки кун олдин йиғилдик, шунинг учун баъзи ноқулайликлар юзага келди. Айниқса, Ўзбекистонни умуман билмайдиган, у ерда ҳеч қачон бўлмаган ва кўп нозик жиҳатлардан бехабар чет эллик мураббий, исмидан қатъи назар, дарҳол натижа бера олишига ҳеч ким кафолат бера олмайди. Бу раҳбарлар ҳисобга олиши керак бўлган маълум жиҳатлардир. Футболчи ёки мураббий баъзан қайси мамлакатга, қандай жамоага, қандай менталитетга эга жойга келаётганини тушунмайди. Менинг фикримча, Тимур бундан кейин ҳам терма жамоада ишлашга лойиқ. Агар мендан сўраётган бўлсангиз, ҳаммаси ўз йўлида давом этиши керак. Менинг фикрим шу.