Агар "бургутлар" раҳбарияти элитада қолишни истаса, 4 ноябрь куни Олмалиқда АГМК ҳам таслим қилиниши керак.

Аммо бу осон бўлмайди. Ўзбекистон чемпионатлари тарихига назар солсак, ўзаро тўғнашувлардаги мутлақ устунлик олмалиқликлар томонида экани кўринади.

21 ўйин: "Андижон"да 4, АГМКда 13 ғалаба, 4 дуранг.
Тўплар нисбати ҳам Миржалол Қосимов шогирдларининг фойдасига — 42:25 (+17).

Эътиборли жиҳати, мазкур жамоаларнинг 1-даврадаги ўйини ҳам прожектор билан боғлиқ муаммо туфайли Олмалиқдаги ОКМК стадионида ўтган ("Андижон" номинал мезбон бўлган) ва 5та гол урилган эди.

Маълумот учун, "Андижон" Олмалиқ клубини 10 йилдан бери мағлуб қила олмаяпти. "Бургутлар"нинг "кончилар" устидан қозонган охирги ғалабаси 2011 йилнинг 5 августига тўғри келади (Лочин Солиев томонидан урилган ягона гол ўйин тақдирини ҳал қилганди).

"Андижон" 1:0 "Олмалиқ" (АГМК)
Гол: Лочин Солиев
"Андижон": Ғайрат Ҳасанов, Икром Ибрагимов, Алексей Касьян, Ильдар Маматказин, Олександр Половков, Иброҳим Отахонов, Ойбек Қиличев, Юрий Целих (Шахбоз Жумабоев 88), Александр Попович (Баҳром Абдураҳимов 66), Лочин Солиев, Бахтиёр Ҳамидуллаев.
"Олмалиқ": Денис Ершов, Иван Кучеренко, Мурод Ҳамроев, Баҳром Юлдашев, Евгений Гоголь, Фарруҳ Нурлибоев, Олег Зотеев, Санжар Шоаҳмедов, Достон Абдураҳмонов (Абдуқаҳҳор Ҳожиакбаров 87), Зоҳир Пиримов (Исроил Эргашев 63), Мўйдин Мамазулумов (Александр Востриков 77).
Огоҳлантиришлар: Александр Попович, Ойбек Қиличев, Юрий Целих - Евгений Гоголь, Мўйдин Мамазулумов, Фарруҳ Нурлибоев.
Четлатиш: Фарруҳ Нурлибаев.

Ўшанда "бургутлар"ни Ориф Маматказин бошқараётган эди. 4 ноябрь куни АГМК очкосиз қолдирилса, Виктор Кумиков 10 йиллик нохуш анънага чек қўйган бўлар эди.

Зеро, россиялик мутахассис Андижонга қайтганидан кейин 2та шундай серияга якун ясашни уддалади: "Андижон" ХХI асрда илк бор Муборакда 3 очко олди (17-тур) ва 5 йиллик танаффусдан кейин "Пахтакор" мағлуб қилинди (19-тур).

"Бунёдкор-W" ОЧЛда қатнашишини биласизми?

Суперлига. 10 йиллик танаффус