Игорь Сергеев "Пахтакор" рекордчиси

Ушбу ўйинда "шерлар" сафида Игорь Сергеев иккита гол уришга муваффақ бўлди. Шу тариқа у Анвар Солиевни ортда қолдириб, "Пахтакор"нинг Ўзбекистон чемпионатидаги энг яхши тўпурарига айланиб олди.

"Пахтакор"нинг Ўзбекистон чемпионатидаги энг яхши тўпурарлари
Игорь Сергеев 87
Анвар Солиев 86
Зайниддин Тожиев 71
Александр Гейнрих 66
Игорь Шквирин 66
Сервер Жепаров 64
Дилмурод Назаров 56
Собир Ходиев 54
Миржалол Қосимов 52
Шуҳрат Мақсудов 51

Шароф Муҳитдинов "Насаф"нинг 1200-голи муаллифи

"Насаф" чемпионатни Навоийда "Қизилқум" устидан 3:1 ҳисобида ғалаба билан бошлади. Шу кунга қадар "аждарлар" Ўзбекистон чемпионатларида жами 1199та гол уришганди. Шароф Муҳитдиновнинг 25-дақиқада урган голи "Насаф"нинг миллий чемпионатимиздаги юбилей 1200-голига айланди.

Нурилло Тўхтасинов 5та ўйиндан буён гол урмоқда

"Бунёдкор" ярим ҳимоячиси Нурилло Тўхтасинов Суперлиганинг сўнгги бешта турида рақиблар дарвозасини ишғол қилди.

2019 йилги мавсумнинг 23-турида сафарда «Андижон» дарвозасига тўп киритган Нурилло шундан сўнг кетма-кет тўртинчи ўйинки майдонни голсиз тарк этаётгани йўқ. 24-турда «Навбаҳор», 25-тур «Пахтакор», 26-турда «Сўғдиёна» дарвозаларини ишғол қилган Тўхтасинов мана бугун мавсумнинг илк ўйинида ҳам ўз ҳисобига гол ёзиб қўйди.

Нурилло Тўхтасинов гол урган ўйинлар
СУПЕРЛИГА-2019
23-тур. «Андижон» - «Бунёдкор» - 1:1
24-тур. «Бунёдкор» - «Навбаҳор» - 2:1
25-тур. «Пахтакор» - «Бунёдкор» - 2:3
26-тур. «Бунёдкор» - «Сўғдиёна» - 2:2

СУПЕРЛИГА-2020
1-тур. «Сурхон» - «Бунёдкор» - 1:3

Тошкент вилояти клублари яна дуранг билан бошлашди ёхуд майдонда ота-ўғиллар

АГМК - "Металлург" учрашувида 1:1 ҳисоби қайд этилди. Қизиғи иккала жамоа ўтган икки йилда ҳам мавсумни дуранг билан бошлаган экан. Ушбу ўйиндаги яна бир эътиборли ҳолат икки жамоа бош мураббийларининг ўғиллари шу куни майдонга тушишди: АГМКда Миржалол Қосимовнинг ўғли Миржамол Қосимов, "Металлург"да Андрей Шипиловнинг фарзанди кичик Андрей Шипилов.

"Машъал" ўз тарихида илк бор йирик ғалаба билан бошлади

Суперлигага қайтган "Машъал" илк турни ўз мухлислари қаршисида "Сўғдиёна"га қарши ўтказиб, 3:0 ҳисобида зафар қучди. Шундай қилиб "Машъал" ўз тарихида илк бор мавсумни йирик ғалаба билан бошлади.

"Қўқон-1912"да биринчи африкалик футболчи майдонга тушди

Бахтиёр Ашурматов бошчилигидаги қўқонликлар "Бухоро"ни 3:0 ҳисобида мағлуб этишди. Мазкур баҳсда майдон эгалари сафида ивуарлик Якуба Бамба захирадан ўйинга қўшилди. Шу тариқа у "Қўқон-1912" сафида ўйнаган биринчи африкалик футболчига айланди.

"Локомотив"да 7 йилдан кейин легионер дублга эришди

Дастлабки турда "Локомотив"нинг россиялик ҳужумчиси Кирилл Погребняк "Андижон" дарвозасига иккита гол урди. Шу тариқа Кирилл 7 йилдан кейин "Локо" сафида дубль қайд этган илк легионерга айланди. Сўнгги бор Ўзбекистон чемпионатида "темирйўлчилар" сафида 2013 йилда легионер футболчи дублга эришган экан - Тожикистонлик Акмал Холматов "Қизилқум"га иккита гол урган.

Нарзулла Сайдуллаев

Суперлига. Қўқондаги биринчи африкалик, Сергеев рекордчи, Муҳитдинов юбилей гол соҳиби, Тўхтасинов тўхтамаяпти ёхуд майдондаги ота-ўғиллар