Ушбу ўйинда қатнашиш учун Доҳа шаҳрига жуда кўп суриялик журналистлар ҳам ташриф буюришган. Биз уларнинг Ўзбекистон билан ўйин ҳақидаги фикрлари билан қизиқдик. Хусусан, PSYRIANP нашри журналисти, суриялик Лайес Байроқдор ўз терма жамоаси имкониятларини юқори баҳолади ва бу фикрларини асослашга ҳаракат қилди.

- Эртанги ўйиндан қандай натижа кутяпсиз?

- Бу ўйин жуда қийин учрашув бўлиши аниқ. Иккала жамоа учун ҳам бу катта синов. Бош мураббийимиз Эктор Куперда ўзбек футболи ҳақида катта билим бор. Бу Сурия терма жамоаси учун катта устунлик беради. Эртанги ўйин натижаси ҳақида мендан дейлик бир ой олдин сўраганингизда мен Ўзбекистон терма жамоасини фаворит сифатида кўрсатган бўлардим. Лекин ҳозир Сурия термаси мен учун фаворитга айланди. Биз яқинда суриялик бўлмаган кучли футболчиларни маҳаллийлаштирдик. Аргентина, Европа ва Перуда ўйнаган бу футболчилар жамоамизни янада кучайтирди. Фикримча, бу ўзгаришлар бизнинг жамоага катта устунлик беради.

- Сурия ва Ўзбекистон ўртасидаги ўйиннинг ҳисобини тахмин қила оласизми?

- Сурия терма жамоаси 1:0 ёки 2:1 ҳисобида ғалаба қозонади.

- Гуруҳ босқичи ўйинларидан кейин сизнингча жадвал қайси кўринишда бўлади?

- Қийин савол. Фикримча, Австралия, Сурия, Ўзбекистон ва Ҳиндистон - шундай тартибда.

- Кескин фикрлар, Ўзбекистон учинчи ўрин билан кейинги босқичга чиқадими?

- Бу омадга боғлиқ, албатта. Мен шу ўринда бир нарсани таъкидлаб ўтишим керак. Ҳиндистон терма жамоаси ҳам охирги пайтлар катта ўсишга эришди. Улар бизнинг гуруҳдаги жамоаларга яхшигина қаршилик кўрсатишади. Рақиблар улардан эҳтиёт бўлишлари керак.

- Тахминлар учун раҳмат. Эртага бу фикрларингиздан ҳафа бўлиб қолмасангиз бўлгани (ҳазил маъносида)

- Иккала жамоага ҳам омад тилайман. Агар эртага Ўзбекистон ғалаба қозонса, чин қалбимдан сизларни табриклайман.

Суриялик яна бир журналист: "Бир ой олдин Ўзбекистонда устунлик бор деган бўлардим, аммо ҳозир Сурия термаси - фаворит!"