Албатта узоқ йўл ўзига яраша машаққатларни бизга тақдим этди.

Аэропортлардаги кутишлар, Сонкхлага учиш учун бир аэропортдан бошқа аэропортга ўтиш, қишнинг совуқ об-ҳавосидан 34-35 даража иссиқ бўлган ўлкага кўникиш ўз-ўзидан қийинчиликларни туғдиради.

Бангкокдан Сонкхла шаҳрига келиб тушганимиздан сўнг аэропортдан меҳмонхонага келгунча теварак атрофни кузатиб келганимиздан сўнг Сонкхла шаҳри Осиё чемпионати ҳавоси билан нафас олаётганини сездик. Йўлларда U23 Осиё чемпионатига бағишланган баннерлар, турли хил рекламалар бу шаҳарда футбол бўйича йирик турнир бошланаётганидан дарак бериб турибди.

Сонкхла шаҳрида айни дамдаги об-ҳаво 30 даражадан бироз юқори бўлиб турибди. Бироқ денгиз шабодаси кишига ёқимли ҳисларни тақдим қилмоқда.

Биз билан билан Абдураҳмон Фозилов бошчилигидаги бир гуруҳ Ўзбекистонлик ашаддий футбол мухлислари ҳам Таиландга етиб келишди. Уларнинг бугунги ўйинга тайёргарликлари жуда авжида. Бугун Ўзбекистон олимпия терма жамоаси футболчилари ўзларини худди уй стадионларида ўйнагандек ҳис қилади десам олдиндан адашмаган бўламан. Яна бир қанча футбол мухлислари эртага Таиландга етиб келишлари ҳақида ҳам маълумот олдик. Демак кундан-кунга терма жамоамизнинг мухлислари кўпайиб бораверади.

Меҳмонхонага жойлашгач тезда акредитациямизни олиш учун Сокхладаги Тинсуланонда стадиони томон ошиқдим. Бу борада меҳмонхона маъмуриятига алоҳида ташаккур этишим лозим, чунки улар мени стадионга келишимга транспорт ажратиб ҳурмат кўрсатишди.

Акредитацияни олгач стадион ичига кириб у ердаги манзарани кўргач, очиғи барча чарчоқлар чиқиб кетди десам бўлаверади. Шунчаки жудаям гўзал! Тайёргарлик аъло даражада, майдон ҳолати футбол ўйнаш учун идеал ҳолатда. Бугун бу стадионда “С” гуруҳидаги иккита ўйин бўлиб ўтади. Журналистлар ҳамда мартабали меҳмонлар учун ва албатта мухлислар учун барча шароитлар муҳайё қилинган.

Қуйидаги расмларни кўриб бунга ўзингиз гувоҳ бўлишингиз мумкин.

Акрамжон Мамадалиев Сонгхла шаҳридан championat.asia сайти учун махсус

Таиланд кундалиги. Сонкхладаги стадион бугунги ўйинга тайёр