Бу инсон ҳақида узоқ гапириш мумкин. Акмал Шораҳмедов, Виталий Денисов, Санжар Турсунов, Фарҳод Тожиев, Марат Бикмаев каби футболчиларни ўз вақтида кашф этиб, тарбиялаб ўзбек футболига етказиб берганининг ўзиёқ Дилшод Нуралиевнинг қандай тоифадаги мураббий эканлигидан далолат бериб турибди.

Шунингдек, Дилшод Жўраалиевич Ўзбекистон U-16 терма жамоаси билан бирга Осиё чемпиони бўлган. Бунга қадар ҳеч бир терма жамоамизга Осиё чемпиони бўлиш бахти насиб этмаганди. Эроннинг Тахти шаҳри мезбонлик қилган қитъа чемпионати Нуралиев жамоасининг триумфи билан якунланган эди. Бугунги кунда миллий терма жамоамизнинг аъзолари Рустам Ашурматов, Достон Ҳамдамов, Отабек Шукуров, Одил Ҳамробеков, Жавоҳир Сидиққов, Акром Комилов сингари футболчилар Дилшод Нуралиевнинг шогирдлари саналади.

Бугунги кунда "Локомотив" ўринбосарлар жамоасида шунингдек клуб футбол мактабини ривожлантиришда ўз ҳиссасини қўшаётган мутахассис ҳақида кўп ва хўп гапириш, у кишига теша тегмаган таърифларни бериш мумкин. Фурсатдан фойдаланиб, барча ўзбекистонлик футбол мухлислари, сайтимиз ўқувчилари ҳамда ижодкорлари, шогирдлари номидан Дилшод Нуралиевга соғлик-саломатлик, оилавий бахт, омад тилаб қоламиз. Туғилган кунингиз муборак бўлсин, Дилшод Жўраалиевич!

Таниқли ёшлар мураббийи Дилшод Нуралиевни табриклаймиз