Шу муносабат билан, терма жамоамиз бош мураббийи Темур Олимхўжаевнинг рақиблар ҳақидаги фикри билан қизиқдик.

"Бу ёшдаги Осиё чемпионатидаги деярли барча жамоаларнинг кучлари тенг бўлади. Муҳими, мусобақага яхши кайфият ва таркибдаги йўқотишларсиз бориш. Бу борада ҳозирча муаммо йўқ, барча шогирдларим турнирга жиддий ҳозирлик кўраяптилар. Рақиб эса тўғриси катта аҳамият касб этиши керак эмас, минимум мақсад ЖЧ йўлланмасини қўлга киритиш", - дейди бош мураббий.

Гуруҳдаги рақиблар ҳақидаги фикр шундай янгради:
- Шимолий кореяликларни анчадан бери биламиз. У ерда бўйдор ва жисмонан баққуват футболчилар кўп. Яман билан ўртоқлик учрашувида тўқнаш келганмиз ва 5:2 ҳисобида ғалаба қозонган эдик. Таиланд ҳам ёмон жамоа эмас. Гуруҳдан муваффақиятли ўтиб олишимиз керак. Мақсад албатта биринчи ўринни қўлга киритиш, шунда Ироқ ёки Уммон терма жамоасига қарши баҳс олиб боришимиз мумкин бўлади. Жанубий Корея эса "С" гуруҳининг фаворити.

- Мусобақага қадар бўлиб ўтадиган ўйинлар ҳақида ахборот берсангиз.
- 23 июнь куни Минск шаҳрида Беларусь терма жамоасига қарши иккита ўртоқлик учрашуви ўтказамиз. Йиғин бир ҳафта давом этади ва унда 17 нафар футболчи иштирок этади. Июль ойида эса Дукентда кенгайтирилган таркиб билан ишлаймиз. Режага кўра, август ойида Словакияда сўнгги йиғинимиз ўтказилинади. Айнан шу йиғин орқали мусобақага борадиган таркибга ойдинлик киритамиз. Бугунги қуръадан кейин бошқа таклифлар ҳам бўлиши мумкин. Бу борада терма жамоалар маркази бизга яқиндан ёрдам бераяпти, - деб ўз фикрларини якунлади Олимхўжаев.

Нодирхўжа Юлдашев

Темур Олимхўжаев: "Мақсад ЖЧ экан, рақиб ким бўлишининг фарқи йўқ"