Ушбу учрашувдан сўнг жамоа мураббийи Тимур Кападзе фикрларини билдириб ўтди.

"Нефтчи" билан баҳсдан сўнг бугунги ўйинга яхши тайёргарлик кўрган эдик. Рақибни қандай ўйнашидан хабаримиз бор эди, уларни ўргангандик. Таркибида яхши савиядаги футболчилар бор, айниқса марказдаги колумбиялик футболчисини ажратиб кўрсата оламан. Шунинг учун йигитларни ушбу учрашувга ҳар томонлама тайёрлашга ҳаракат қилдик. Кўрганингиздек ўйинимиз яхши чиқди. Тўғри, қайсидир паллада бўшлиқлар юзага келган бўлиши мумкин. Умуман олганда футболчилар яхши ўйин намойиш қилишди. Кўп вазиятлар яратдик. Улардан фойдаланишда айрим ҳолатларда тажриба етишмаслиги ўз сўзини айтди. Хатоларни таҳлил қилиб, устида ишлаймиз. Ўйлайманки, ўйиндан ўйинга ҳаракатларимиз янада яхшиланиб боради. Ўзига бўлган ишончи ортиб боради.

- Жамоавий ўйин рақиб жарима майдончасига келганда йўқолиб қоляпти...
- Майдон бироз қуруқроқ бўлгани учун кўп вазиятларда тўп тўхтаб қолаверди. Ўйинда энг қийини гол уриш. Жарима майдончасига келганда футболчиларга хотиржамлик ва тажриба етишмади. Ёш футболчилар бунда ўйинларда тобланишади.

- Сиз одатда жамоавий ўйинни йўлга қўясиз. Аммо бугун футболчилар индивидуал жиҳатларини намойиш қилиш истаги устунлик қилгандек кўринди...
- Ҳимояланаётганимизда жамоавий ҳаракатлар муҳим ҳисобланади. Олдинги чизиқда эса индивидуал ҳаракатлар катта саҳнага чиқади. Футболчиларга ҳар доим рақиб борлигини, ақл билан тўп тепиш кераклигини таъкидлайман. Ҳимоядаги индивидуал хатолар ўзини оқламаслиги мумкин. Лекин олдиндагилар алдаб хато қилса бошқа гап. Лекин қаерда алдаш керак ёки тўпни узатиш кераклигини тушунтириб, онгига сингдириб боряпмиз.

Тимур Кападзе: "Ўйинда энг қийини гол уриш"