Бу галги қаҳрамонимиз футбол афсонаси Зинедин Зидан бўлади.

Зинедин Зидан ҳақида қисқача маълумот:

Туғилган санаси: 1972 йил, 23 июнь.
Туғилган жойи: Франция, Марсель шаҳри.
Бўйи: 185 см
Позицияси: ярим ҳимоячи
Ўйнаган жамоалари: "Канн" (1988-1992), "Бордо" (1992-1996), "Ювентус" (1996-2001), "Реал" (2001-2006)
Мураббийлик фаолияти: "Реал Мадрид Кастилья" (2014-...)

Зинедин Зидан жаҳон футболида ўз номига эга кам сонли футболчилардан бири ҳисобланади. Зидан ўз фаолияти давомида жуда катта ютуқларга эришган. Зидан профессионал футболчилик фаолиятини Франциянинг "Канн" жамоасида бошлаган.
Бу жамоада Зидан футболчи сифатида улғайган бўлса, орадан тўрт йил ўтиб "Бордо"га ўтади ва бу жамоада Зидан футболчи сифатида янада шаклланади. Зидан Франция чемпионатидаги 8 йиллик фаолиятидан сўнг Италия гранди "Ювентус"га йўл олади. Зинедин Зидан Туриндаги фаолияти давомида юксак даражадаги маҳорат соҳиби эканлигини кўрсатди ва айнан "Юве"да Зидан янада янги поғонага чиқишга муваффақ бўлади. "Ювентус"даги иштироклари орқали Зидан жаҳон футболи юлдузи даражасига чиқади.

Зинедин Зидан 1998 йилги Жаҳон чемпионатида Франция терма жамоаси билан катта муваффақият қозонади. Мундиал финалида Франция терма жамоаси Бразилия билан дуч келади. Финалда қаҳрамонимиз Зиданнинг қаҳрамонлиги эвазига Франция Бразилияни мағлуб этади ва Жаҳон чемпиони номини қўлга киритади.

Зидан эса айнан ўша йилда илк бор "Олтин тўп" соҳибига айланади.

Зидан бу муваффақиятлар билан тўхтаб қолмайди. Қаҳрамонимиз жаҳон чемпионлиги ва жаҳоннинг энг яхши футболчиси бўлганидан сўнг Франция терма жамоаси билан Европа чемпионатида ҳам зафар қучади.
Евро-2000да Зидан етакчилигидаги французлар финалда Италияни мағлуб этишни уддасидан чиқишади. Терма жамоанинг бу муваффақиятида Зиданнинг хизматлари жуда катта бўлган.

Зидан Франция терма жамоаси сафидаги энг сермаҳсул мавсумини айнан ЖЧ-1998 ҳамда Евро-2000да ўтказган.

"Ювентус" билан Италияда, УЕФА кубоги, қитъалараро мусобақасида зафар қучган ва "Олтин тўп"ни икки марта қўлга киритган Зидан кейинги фаолиятини Мадриднинг "Реал" клуби билан боғлайди. "Реал" жаҳон даражасига кўтарилган Зизуни жуда катта пуллар эвазига сотиб олади ва бу трансфер амалда ўзини оқлайди.

Сабаби, Зидан "Реал"га Испания чемпионатида ғолиб бўлиш ва Европа чемпионлар лигасини қўлга киритилишида жуда муҳим ролни ўйнайди. Европа чемпионлар лигаси финалида "Байер" дарвозасига киритган фантастик гол якунда "Реал"га бош совринни олиб беради.

Зидан "Реал"да беш мавсум тўп тепганидан сўнг ниҳоят бутсаларини миҳга илишга қарор қилади. "Реал" билан деярли барча совринларга эга чиққан Зизу ЖЧ-2006дан сўнг фаолиятини тугатишга қарор қилганини маълум қилади.

Зиданнинг футболчилик фаолиятидаги финиши энг йирик мусобақа финалига тўғри келади. Германияда ўтган мундиал финалига йўл олган Франция ҳал қилувчи баҳсда Италияга қарши саф тортади.

Финалда эса бош қаҳрамон Зизу бўлади. Финалда пенальтидан ҳисобни очган Зинедин Зидан Францияни олдинга олиб чиқади. Бироқ Италия ҳимоячиси Марко Матерацци бурчак зарбасидан сўнг мувозанатни тиклайди ва асосий вақтда ғолиб номи аниқланмайди.
Қўшимча таймларда эса финал қаҳрамони бўлиб турган икки футболчи Зинедин Зидан ва Марко Матерацци ўзаро тортишиб қолишади. Зинедин Зидан эса Италия терма жамоаси ҳимоячиси Марко Матераццини кўкрагига "калла" қўяди. Зизунинг футболчилик фаолиятидаги сўнгги нуқтаси финалдаги қизил карточка ва "калла" қўйгани билан эсда қолади. Бир киши кам бўлиб қолган Франция эса якунда пенальтилар сериясида Италияга имкониятни бой беради.

Зидан эса фаолиятини айнан шу нотада якунлаб жуда катта шов-шувга сабаб бўлади.

Зидан бир сўз билан айтганда футбол оламида жуда катта шахс. Зизу эришган ютуқлар, совринларга эришишни ҳар қандай футболчи орзу қилади.

Зиданнинг тўп билан муомалада бўлиш санъати, ўзгача дид билан ҳаракатланиши ва фантастик техникасини ҳар қандай ишқибоз соғинади.

Эришган ютуқлари:

- "Интертото" кубоги (1995)
- Италия чемпиони (1997, 1998)
- Қитъалараро кубоги соҳиби (1996, 2002)
- Италия суперкубоги (1997)
- УЕФА суперкубоги (1996, 2002)
- Испания чемпиони (2003)
- Испания суперкубоги (2001, 2003)
- Европа чемпионлар лигаси ғолиби (2002)
- Жаҳон чемпиони (1998)
- Европа чемпиони (2000)
- Қирол Ҳассан кубоги соҳиби (1998, 2000)

Зинедин Зиданнинг шахсий ютуқлари:

- "Олтин тўп" соҳиби (1998, 2000, 2003)
- Европанинг энг яхши футболчиси (1998)
- Жаҳон чемпионатининг энг яхши футболчиси (2006)
- УЕФАнинг сўнгги 50 йилликдаги энг яхши футболчиси (2004)
- Франциянинг энг яхши ёш футболчиси (1993)
- Италия чемпионатининг энг яхши легионери (1997, 2000, 2001)
- Испания чемпионатининг энг яхши легионери (2002)
- Франциянинг энг яхши футболчиси (1998, 2002)
- Жаҳоннинг энг яхши плеймекери (2006)

Бу эса 43-ёшли Зинедин Зидан. Қаҳрамонимиз ҳозирги пайтда "Реал"нинг ёшлар жамоаси "Кастилья"ни бошқариб бормоқда

Тунги архив. №1 - Габриэль Батистута

Тунги архив. №2 - Яп Стам

Тунги архив. №3 - Вальдеррама

Тунги архив. №4 - Миржалол Қосимов

Тунги архив. №5 - Зинедин Зидан