Ўртамиёналар тўқнашуви

Ўтган тур кутилмаганда қосимпошоликларни меҳмонда мағлубиятга учратган "Генчлербирлиги" бу сафар ўз майдонида аввалги ҳафта Истанбул шаҳри жамоасидан очко тортиб олган "Йени Малатьяспор"ни қабул қилади. Хамза Хамзаоглу шогирдлари ичида бир вақтлар Европа топ-клубларида жавлон урган Стефан Сессеньон, Руминия миллий терма жамоасининг кўп йиллик асосий ҳужумчиси Богдан Станку ва 30 ёшли тажрибали Жованни Сио каби футболчилар бор. Меҳмонлар таркибидан эса, бир неча мавсум Франциянинг "Лорьян" жамоаси шарафини ҳимоя қилган Морике Фофана ҳамда мусобақа бош тўпурарлигига даьвогарлик қилаётган Адис Яхович жой олган.

Рақобатчилар баҳси

Айни пайтга келиб, мусобақа жадвалида 14 очко жамғарган ҳолда 12-ўринни эгаллаган "Ризеспор" ўз мухлислари қаршисида яқин таьқибчиси бўлган жамоа "Коньяспор" билан ўзаро жанг олиб боради. Олдинги турда, сенсацион равишда чемпионат дебьютантидан мағлуб бўлган ризеликлар эндиги учрашувда Конья шаҳри жамоасига жиддий қаршилик кўрсатиши турган гап. Меҳмон жамоа бўлса, "Бешиктош"дан ишқибозлари кўз ўнгида енгилганди.

Аутсайдер Сивасга учади

Сўнгги икки ўйинни ўз фойдасига ижобий ҳал қила олган ва оҳирги пайтларда омади чопаётган кам сонли жамоалардан бири бўлган турнир жадвалининг янги карвонбошиси "Сивасспор" эндиги сафар ўз уйида аввалги турда мухлислари қаршисида ўйнаганига қарамай мағлуб бўлган бечораҳол "Қосимпошо"ни меҳмон қилади. Агар пешқадам муваффақиятсизликка йўлиқадиган бўлса, 5-қаторгача сурилиши мумкин. Хавфли зона ёқасига келиб қолган қосимпошоликлар эса, навбатдаги очко йўқотишдан кейин қуйи поғоналарга мустаҳкамроқ жойлашиб олиши еҳтимоли бор.

Анқараликлар Аланьяда меҳмон

Мавсум бошидан то 11-турга қадар, якка карвонбошиликни ҳеч кимга бермай келган ва лекин афсуски оҳирги икки баҳсда кутилмаган равишда бирин-кетин аввалига меҳмонда кейин ўз майдонида бир ҳил кўринишда яьни 1:0, 0:1 ҳисобида мағлубиятга учраган аламзада "Аланьяспор" анчадан бери ғалаба нималигини билмай келаётган ва кетма-кет омадсизликлардан сўнг, тобора жарликка қулаб бораётган "Анқарагюжю"га қарши баҳс олиб борадиган бўлди. Кўрамиз, оҳирги вақтларда ҳеч "кетмони учмаётган" икки клуб ўртасидаги учрашувда кимнинг қўли баланд келаркин.

Ўртамиёна етакчига қарши

Ўтган турда узоқ вақт мобайнида турнир жадвалида мутлақ ҳокимликни ўрнатган ва сўнгги икки баҳсдаги омадсизликдан кетидан етакчиликни бой берган кимсан Аланья шаҳри бош жамоасини ер тишлатган "Гёзтепе" бу сафар аввалги тур малатьяликлар билан нурсиз дурангга имзо чеккан "Фенербахче" билан рўбаро келишади. Кўрамиз, Эрсун Янал бошчилигидаги Маурисио Исла, Адил Рами, Виктор Мозес ва ҳужумчилар Макс Крузе ҳамда Ведат Мурикилардан иборат юлдузли жамоа "чақилмас ёнғоқ" жамоалардан бири бўлган мезбонларга қарши қандай ўйин кўрсатади.

Дебютант газиликлар меҳмони

Аввалги тур доирасида мусобақанинг етакчи жамоаларига етарлича бошоғриғи бўла оладиган Ризе шаҳри жамоаси устидан ишончли ғалабага эришган "Денизлиспор" энди сафарда анталияликлар билан сулҳга рози бўлган "Газиантеп"га қарши баҳс олиб боради. Дам олиш кунидаги ўйинларни бошлаб берувчи учрашув натижаси кўпчиликни қизиқтириши табиий. Чунки, ҳар иккала жамоа турнир жадвалида ёнма-ён жойлашган.

Анталияликлар Истанбулга учишади

Сўнгги вақтлардаги жуда ҳам қониқарсиз натижалари сабабли борган сари қуйига пастлаб бораётган ва ўтган турда ҳам мағлубият аламини тотиб кўрган "Антальяспор" бу сафар олдинги ҳафта ўтказилган турнинг марказий учрашувида кимсан Галата саройи эгаларини енгган "Истанбул Башакшеҳир" билан қимматли уч очко учун мардонавор жанг олиб бориши кутилмоқда. Ушбу баҳсда меҳмон жамоа ҳимоячилари анчагина тер тўкишларига тўғри келади. Сабаби, Окан Бурук шогирдлари орасида бразилиялик футбол афсунгарларидан бири бўлган машҳур Робиньо, "Челси"да қадрланмаган форвард Демба Ба ҳамда юқори савияли вингер Гекхан Инлердек кучли футболчилар бор.

Етакчилар ўртасидаги жанг

Жорий турнинг марказий мақомдаги учрашувида олдинги тур меҳмонда кимсан анқараликларни янчиб ташлаган ва мусобақа жадвалида ҳам борган сари юқорилаб, ҳозирда 2-ўринни банд этиб турган "Трабзонспор" эндиги сафар Истанбул шаҳрининг олди клубларидан бўлган "Башакшеҳир"дан аламли мағлубиятни қабул қилиб олган "Галатасарой"га қарши ўз мухлислари қаршисида ўйнайди. Ҳеч бир шубҳасиз ушбу баҳс кўпчилик мухлис-у мутаҳассисларнинг катта қизиқишига сабаб бўлмоқда. Кўрамиз, кучлилар тўқнашувида ким ғолиб бўлар экан?

Аутсайдерда Истанбулда меҳмон

Мавсумни ҳар қачонгиданда суст бошлаган ва ҳозиргача ўзининг тахтига қайта олмай келаётган шонли тарихга эга клуб "Бешиктош" мусобақа жадвалида аста-секинлик билан юқорилаб боряпти. Улар жорий турга якун ясаб берувчи ўйинда ўтган турда ишчибозлари кўз ўнгида чемпионатнинг янги карвонбошисига айланган "Сивасспор"дан қақшатқич мағлубиятга учраган "Қайсариспор" билан ўзаро баҳс олиб боришади.

Хондамир Ҳакимов тайёрлади

Туркия Суперлигаси. Марказий ўйинда Трабзон шаҳри жамоаси истанбулликларни меҳмон қилади. 13-тур превьюси