Бугунги кунда "Турон" жамоасини бошқараётган Ислом Исмоилов ҳам ана шундай ёш мураббийлар тоифасидан. Куни кеча ўзининг таваллуд кунини нишонлаган ёш мутахассис Про лигада ўз жамоасини Суперлига сари етакламоқда.

Мураббийлик фаолиятини "Пахтакор" академиясида бошлаган Ислом Исмоилов Станислав Кудряшовга болларни шуғуллантиришда яқиндан кўмаклашди. Бу борада унинг ўзи шундай дейди.

"Илк мураббийлик фаолиятимни "Пахтакор" футбол академияда бошлаганман. У ерда Станислав Кудряшовга 2001-йилда туғилган болаларни тайёрлашда яқиндан ёрдам берганман. "Пахтакор" футбол академиясидаги 2-3 йиллик фаолиятим давомида кўп нарсаларни ўргандим, ўз кўникма ва малакаларимни оширдим. Сабаби, барчамизга маълум ушбу академияда ўзбек футболидаги энг номдор масканлардан ҳисобланади.

У ерда фаолият олиб борадиган мутахассислар ўз ишига профессионал тарзда ёндашадилар. Станислав Кудряшов билан биргаликдаги фаолиятим давомида у кишидан жуда кўп нарсаларни ўргандим, тажриба тўпладим. Мураббийликдаги илк фаолиятимни айнан у кишини ёнида бошлаганлигим доимо ёдимда қолади. "Пахтакор" футбол академиясида тўплаган тажрибаларим бугунги кунда эришаётган ютуқларимнинг тамал тоши сифатида хизмат қилади деб айтсам муболаға бўлмаса керак. Бу академияда иш жараёни жуда қизғин кечади, кун давомида ҳамма футбол ҳақида ўйлайди, вазиятлар таҳлил қилинади, мутахассислар ўртасида баҳс-мунозаралар бўлади. Умуман олиб айтганда бу масканда ҳамма футбол билан яшайди. Шунга яраша натижалари ҳам бор, мана кўриб турганингиздек, "Пахтакор" футбол академиясидан қанчадан-қанча иқтидорли футболчилар етишиб чиқмоқда. Бу албатта ўзбек футболининг янада ривожланишига хизмат қилади".

Ўтган мавсумнинг иккинчи даврасида "Турон" Баҳром Ҳакимовни истеъфога чиқаргач жамоа бошқаруви Ислом Исмоиловга ишониб топширилди. Мазкур жамоага келгунига қадар эса бир неча йўлларни босиб ўтгани шубҳасиз.

"Бугунга қадар юқорида айтганимдек дастлаб "Пахтакор" футбол академиясида фаолият олиб борганман. Кейинроқ менга Марғилоннинг "Атласчи" жамоасидан таклиф тушган, лекин молиявий сабаблар туфайли жамоа ўша пайтдаги Биринчи лига мусобақаларида иштирок эта олмаган. Шундан сўнг Ёзёвон туманининг "Ёзёвон-Лочинлари" жамоасида икки йил давомида фаолият бордим. Бу жамоадаги фаолиятимни профессионал футболдаги илк мураббийлик ишим сифатида ёдимда қолган. "Ёзёвон-Лочинлари"да ҳам кўплаб тажриба тўпладим, жамоа билан бир қатор натижаларга эришганмиз. Кейинчалик "Истиқлол" жамоасида ҳам қисқа муддат ишладим. Ундан кейин Марғилон шаҳрида ҳамкасбларим билан "Фаровон" футбол академиясини ташкил этдик. Ҳозирги кунда бу академиядан жуда кўплаб иқтидорли футболчилар етишиб чиқаётганлигидан барчанинг хабари бор албатта".

Жорий мавсумда ажойиб жамоани шакллантирган Ислом Исмоиловга фаолиятида омад ва зафарлар тилаб қоламиз. "Турон" жамоаси билан муваффақиятларга эришишига тилакдошмиз!

"Турон"ни Суперлига сари етаклаётган Ислом Исмоилов ҳақида