25 сентябрь куни ўсмирлар ўртасидаги 2014 йилги Осиё чемпионати «В» саралаш гуруҳи 1-тур учрашувлари бўлиб ўтди. Унда Темур Олимхўжаев бошчилигидаги Ўзбекистон ўсмирлар терма жамоасининг икки рақиби – Яман ва Фаластин ўсмирлари ўзаро майдонга тушишди.

Қизиқарли кечган ўйин 3:1 ҳисобида яманлик ўсмирлар фойдасига ҳал бўлди. Фаластин ўсмирлар терма жамоаси биринчи бўлимда пенальтидан фойдалана олмади, бундан аввалроқ эса Яман ҳисобни очишга муваффақ бўлди. Эътиборли томони, Фаластиннинг амалга оширилмаган пенальтисидан кўп ўтмай, Яман ўсмирлар терма жамоаси вакили иккинчи сариқ карточкадан сўнг майдондан четлатилди.

Иккинчи бўлимда, майдонда камчилик билан ўйнаганига қарамай, яманлик ўсмирлар икки маротаба Фаластин ўсмирлари дарвозасини ишғол қилишга муваффақ бўлди. Ўйин якунига Фаластин ўсмирлар терма жамоаси биргина жавоб тўпини кирита олишди. Ўйин шу тариқа 3:1 ҳисобида Яман ўсмирлар терма жамоаси фойдасига ҳал бўлди.

«В» саралаш гуруҳидаги навбатдаги ўйин 27 сентябрь куни ўтказилади. «Жар» стадионида 16:00да бошланадиган ўйинда Ўзбекистон ўсмирлар терма жамоаси Фаластинга қарши майдонга тушади.

U-16 Осиё чемпионати-2014 саралаш
«В» саралаш гуруҳи, 1-тур учрашуви
25 сентябрь, чоршанба
ЯМАН – ФАЛАСТИН 3:1 (1:0)

U-16 ОЧ саралаши: Яман (U-16) - Фаластин (U-16) - 3:1