Бундан аввал Ла Лига "Вильярреал" – "Барселона" учрашувини АҚШда, Майами шаҳрида ўтказиш учун УЕФАдан рухсат сўраган, Серия А эса "Милан" – "Комо" баҳсини Австралиянинг Перт шаҳрида ўтказиш имкониятини сўраган эди.

Европа футбол ассоциациялари уюшмаси (УЕФА) Испания ва Италия чемпионатларининг мазкур ўйинларини истисно тариқасида чет элда ўтказишга рухсат берди, аммо миллий лигалар ўйинлари мамлакат ичида бўлиши кераклигини таъкидлади.

"УЕФА бугун яна бир бор миллий лигалар ўйинларини ўз мамлакатларидан ташқарида ўтказиш ғоясига кескин қарши эканини билдирди.

Ўтган ой Тиранада бўлиб ўтган Ижроия қўмитаси йиғилиши ортидан УЕФА Испания ва Италия миллий ассоциацияларидан келиб тушган сўровларни ҳисобга олган ҳолда бу ишнинг оқибатларини баҳолаш учун қўшимча маслаҳатлашувлар ўтказди.

Ушбу маслаҳатлар мухлислар, бошқа лигалар, клублар, футболчилар ва европалик институтлар томонидан миллий лигалар ўйинларини чет элга кўчириш ғоясига нисбатан қўллаб-қувватлаш йўқлигини яна бир бор тасдиқлади.

Шу билан бирга, ФИФАнинг бу борадаги меъёрий базаси ҳозирча қайта кўриб чиқилаётган бўлса-да, аниқ ва батафсил эмаслиги туфайли, УЕФА Ижроия қўмитаси бу икки сўровни истисно тариқасида маъқуллади.

УЕФА келгусидаги ФИФА ишларида фаол иштирок этади ва ички мусобақалар яхлитлигини, шунингдек, клублар, уларнинг мухлислари ва маҳаллий жамоалар ўртасидаги яқин алоқаларни сақлаб қолишни таъминлайди", – дейилади УЕФА баёнотида.

УЕФА "Барселона" ва "Милан"га АҚШ ва Австралияда ўйин ўтказишга рухсат берди, лекин ташкилот миллий лигалар ўйинларини чет элда ўтказишни қўллаб-қувватламайди