Бу азал-азалдан давом этиб келаётган миллий қадрият, урф-одатларимиз сирасига киради.

“GM Uzbekistan” акциядорлик жамияти Хоразм филиали томонидан 9 май – Хотира ва қадрлаш куни муносабати билан мини футбол бўйича уюштирилган турнир юртимиз тинчлиги, элимиз осойишталиги йўлида мардлик ва жасорат кўрсатиб ўз жонини фидо қилган Ўзбекистон Республикаси Давлат хавфсизлик хизмати марҳум ходимлари Сергей Давидов, Эрик Гаязов ва Сергей Нечипуренконинг порлоқ хотирасига бағишланди.

Филиалнинг Питнак шаҳридаги футбол майдонида уюштирилган мазкур мусобақада 10 та жамоа қатнашди. Муболаға эмас, ҳар бир учрашув қизиқарли ва байрамона кайфиятда ўтди. Турнир ғолиблигига “Ҳарбий қисм” жамоаси сазовор бўлди. Иккинчи ўрин Ўзбекистон ёшлар иттифоқи Ҳазорасп тумани кенгаши футболчиларига насиб этди. Фахрли учинчи ўринни “GM O’zbekiston” АЖ Хоразм вилояти филиалининг “Khorezm Аutо” жамоаси қўлга киритди.

- Илк бор уюштирилган турниримиз барчада қизиқиш уйғотди, - дейди мусобақа бош ҳаками Отабек Артиков. – Унда кўплаб жамоалар қатнашиш истагини билдиришди. Турнирнинг очилиш ва ёпилиш маросимлари юксак савияда ташкил этилди. Келгусида, мусобақани анъанага айлантириш ниятимиз бор. Зеро, “Аждодларни хотирлаш-муқаддас қадрият”дир. Аминмизки, бундай мусобақалар ёш авлодни ватанимизга садоқатли, халқимизга меҳр-муҳаббатли ва ватанпарварлик руҳида тарбиялашга, бунинг баробарида, ҳамюртларимизни тинчлик ва осойишталикнинг қадрига етишида хизмат қилади.

Мусобақанинг ёпилиш маросимида ғолиб ва совриндор жамоалар ташкилотчилар томонидан диплом ва қимматбаҳо совғалар билан тақдирланишди.

Икром ХУДОЙБЕРГАНОВ.

Уларнинг жасоратлари унутилмайди