КХДРга қарши ўйин олдидан ўз вақтида миллий терма жамоамиз либосида ўйнаган собиқ футболчи, Улуғбек Рўзимовга мурожаат қилдик.

- Улуғбек ака, Австралияда старт олган Осиё Кубогида терма жамоамиз бугун гуруҳдаги илк учрашувини ўтказади. Мазкур ўйин олдидан фикрингиз қандай?
- Ҳозирча бу ҳақда бир нима дейиш қийин менга. Биринчи ўйиндан кейингина хулоса қилса бўлади. Чунки мен МТЖни битта синов назорат ўйинини кўрдим. Шунинг учун тўлиқ тасаввурга эга эмасман. Жиддий бир фикр билдиргани ҳам қийналаман. Лекин шуни унутмаслик керакки, ҳар қандай мусобақада биринчи ўйин мураккаб бўлади.

- Рақиб жамоа КХДР ҳақида ҳам айтарли маълумотга эга бўлмасангиз керак. Лекин қандай ҳисобни кутяпсиз?
- Албатта Ўзбекистон миллий терма жамоасини ғалаба қозонишини истайман. Ахир халқимиз шуни кутяпти. Боз устига биринчи турдаги ижобий натижа кейинги ўйинларда йигитларга руҳан яхши таъсир ўтказади. Шунинг учун Яратгандан фақат ва фақат ғалаба сўраймиз.

- Чемпионат фаворитлари дея кимларни кўряпсиз?
- Мен сизга айтсам, Осиё чемпионатига кучсиз жамоа бормайди. Бирортасини кучли ёки аксинча деб бўлмайди. Футболчилар ҳам шуни хис этиш керак. Рақибни менсимаслик ёмон холатларга олиб келишини тушуниш лозим. Шу боис ҳар бир баҳсга жиддий қараш жоиз. Аниқ номларга келадиган бўлсак, бу борада 4та терма жамоани кўрсатиб ўтишим мумкин. Булар: табиийки ўз-ўзидан биринчи ўринда Ўзбекистондан деган бўлардим. Кейин Австарлия, Япония, Жанубий Кореядан ҳам кўп нарса кутса бўлади. Саудия Арабистони ҳам кучайиб бормоқда. Балки улар ҳам фаворитларга жиддий ташвиш туғдирар.

Исломбек Рустамбеков суҳбатлашди.

Улуғбек Рўзимов: “Ҳар қандай мусобақанинг илк учрашуви қийин бўлади”