Куни кеча Бирлашган Араб Амирликлари терма жамоаси собиқ футболчиси Умар Абдулраҳмон 34 ёшида футболчилик фаолиятини якунлаганини маълум қилди.

Профессионал футболчилигида у "Ал Айн", "Ал Ҳилол", "Ал Жазира", "Шабаб Ал-Аҳли" жамоаларида ҳаракат қилган. Абдулраҳмон фаолияти давомида 1 марта Саудия Арабистони Суперкубоги, 6 марта БАА чемпионлиги, 1 марта Араб кўрфази кубогини қўлга киритган. 2016 йилда Осиёнинг энг яхши футболчиси бўлган.

Ярим ҳимоячининг порлоқ даврида унга Европанинг кўплаб гранд жамоалари қизиқиш билдирган. Жумладан, Англиянинг "Манчестер Сити" клубида икки ҳафта давомида кўрикда бўлган.

Умар Абдулраҳмон 2012 йилги Олимпия ўйинларида кўзга ташлангач, АПЛ клуби 20 ёшли футболчини таклиф этган.

Манчестерга етиб келганидан сўнг, у дарҳол жамоа машғулотларига қўшилди. Синов муддати икки ҳафта давом этди – у назорат ўйинларида майдонга тушди ва ҳисобот ижобий баҳоланди. Бироқ битим ишлаш рухсатномаси (work permit) ва терма жамоанинг рейтинги билан боғлиқ муаммолар сабаб амалга ошмай қолди.

Англия футбол ассоциацияси қонунларига кўра, иш рухсатномасини олиш учун футболчи ўтган икки йил давомида ўз мамлакатининг "А" тоифасидаги халқаро ўйинларининг камида 75 фоизида майдонга тушган бўлиши керак. Шунингдек, футболчининг мамлакати ФИФА рейтингида илк 70 таликка кирган бўлиши лозим. БАА эса ўша пайтда 121-ўринда жойлашганди.

Шунга қарамай, "Сити" Абдулраҳмоннинг Манчестердаги машғулот даврида йиғилган маълумотларни "Ал Айн" клуби билан бўлишишга рози бўлган. Араб клубига футболчининг хатти-ҳаракатларини ўз ичига олган DVD дисклари топширилган.

Эслатиб ўтамиз, айни пайтда "Манчестер Сити"да осиёлик бошқа бир футболчи – Абдуқодир Ҳусанов тўп тепмоқда.

Умар Абдулраҳмоннинг "Манчестер Сити"га трансфери нега амалга ошмаган?