"Ҳар доимгидек кўплаб вазиятлар яратмоқдамиз, аммо гол уришга келганда яна оқсаяпмиз. Тезкор гол урилганидан сўнг янада яхшироқ ўйин кўрсатишимиз керак эди. Лекин бу нарса амалга ошмади. Муҳими уч очкони қўлга киритдик. Ярим ҳимоя чизиғимиз бугун кутилган ўйинни намойиш этиб бера олмади. Дилшод Раҳматуллаевга келадиган бўлсак, у кўп вақтни жароҳати боис ўтказиб юборганди. Жароҳатидан қайтганида эса унинг ўрнини бошқа футболчи олиб қўйганди. Бизда рақобат жуда кучли. Барча асосий таркибга кириши учун курашиши ва бунга лойиқ эканлигини исботлаши даркор.

- Игнатий Нестеров асосан захирада қолиб кетмоқда. Маъмур Икромов "Локомотив"нинг асосий дарвозабони деб ҳисоблайсизми?
- Маъмур Икромов ва Игнатий Нестеров бир хил даражадаги дарвозабонлар саналишади. Нестеров жароҳати боис мавсумни илк қисмини ўтказиб юборди. Унинг ўрнини эса Маъмур Икромов тўлиқ эгаллади ва ҳозирда ишончни оқламоқда. Ким кўпроқ майдонга тушишга тайёр бўлса ўшани таркибга киритаман. Маъмур Икромовнинг кўрсатаётган ўйинидан кўнглим тўлмоқда.

- МТЖ 16 июнь куни учрашув ўтказади. "Локомотив" эса тақвим бўйича 18 июнь куни навбатдаги ўйинини ўтказади. Бу сизга ноқулайликлар келтириб чиқармайдими?
- Мана ўзларингиз кўриб турибсизлар. Нима ҳам қилардик? Биздан олти нафар футболчи терма жамоага жалб этилган.

- Балки бу нарса "Локо"га фойдадир, қолган футболчилар учун ўзларини кўрсатиши учун айни муддао бўлар...
- Ҳа, тўғри айтдингиз. Ўтган йили айнан шу нарса бизга фойда келтирганди. Олтин медалларни қўлдан бой бергандик. Яна нима ҳам дердик...

Вадим Абрамов: "Ҳар доимгидек гол уришга келганда оқсаяпмиз"