- Ўйин ҳақида фикрингиз?

- Самарқандда узоқ кутилган ғалабани қўлга киритдик ва бу билан мухлисларни табриклайман. Бизни қўллаб турган ва стадионга келган ҳаммага раҳмат. Учрашувга келадиган бўлсак, бугун жуда яхши жамоа билан ўйнадик. ОКМК рақобатли жамоа, чемпионат етакчиларидан бири. Шу боис ғалаба қозонганимиз икки карра хурсанд қилди. Йигитлар кўп куч сарфлашди, энди кейинги баҳс учун тезрок тикланмасак бўлмайди.

- ОКМК айниқса охирги дақиқаларда яхши футбол намойиш этиб гол уриб кетади. Бугун ҳам шундай бўлиши мумкин эди, аммо жамоангиз яхши ҳимоялана олди.

- Биз рақибнинг стандартларда кучли эканини билардик, шу боис "иккинчи қават"да яхши ўйнайдиган футболчиларни туширдик. Яна бир бор футболчиларимизга раҳмат, 20 август куни яна майдонга тушамиз ва шу ўйинда ҳам бор куч билан ҳаракат қилишларини тилаб қоламан.

- Бугун таркибда ротацияга қўл урдингиз. Бу нима билан боғлиқ?

- Ҳар ўйиндан олдин рақибни ўрганиб чиққан ҳолда таркибни белгилаймиз. Биласиз, асосий дарвозабонимиз бўйи унчалик баланд эмас. ОКМКда бош билан яхши ўйнайдиган футболчилар борлигини инобатга олиб, дарвозага Эдем Немановни қўйдик. Бошқа чизиқларга ҳам шундай ўзгаришларни қилдик.

- Вилоят ҳокими билан гашлаганингизда янги стадион ва база ҳақида гап борганди.

- Вилоят ҳокимимизга катта раҳмат, "Динамо" учун ҳамма шароитни қилиб беряпти. Ўйлашимча, шу йилнинг ўзида янги базамиз фойдаланишга топширилади. Ҳаммаси секин-аста бўлади.

- Улуғбек Ҳошимовнинг жароҳати ҳақида

- Унинг тезроқ соғайиб кетишидан умидворман. "Сўғдиёна" билан ўйингача тайёр бўлишини жамоа шифокорлари билан маслаҳатлашиб ҳал қиламиз.

- Турнир жадвалида жуда зич ҳолат юзага келган. "Динамо"нинг имкониятлари қандай деб ўйлайсиз? Ҳар ҳолда бюджет томонлама биздан анча юқори жамоалар билан беллашишга тўғри келади.

- Майдонда пул футбол ўйнамайди, футболчилар футбол ўйнайди. Биз ҳам энг яхшисига умид қиламиз. Мавсумни "Насаф" билан ўйнаб якунлаймиз. Бу охирги ўйинимиз бўлади ва шу учрашувда ҳам кўп нарса ҳал бўлиб кетиши мумкин.

- Стадиондаги муҳит ҳақида

- Мен мухлисларимизни табрикладим. Бугун стадионда жуда яхши муҳит ҳукмрон сурди. Ишқибозлар 12-ўйинчидек ўзларини тутишди. Мухлислар бизга доим кўмак бериб туришади. Мухлислик борасида Самарқанд алоҳида ажралиб туради, мухлислар бизни қўллагани стадионга келишади ва ўз навбатида биз ҳам улар олдидаги масъулиятни ҳис қиламиз. Шу боис ҳам матбуот анжуманини ўз майдонимизда узоқ кутилган ғалаба билан бошладим, чунки ишқибозлар уйдаги ютуқни соғиниб қолишганди.

Вадим Абрамов: "Мухлисларимиз уйдаги ғалабани соғиниб қолишганди"