Вадим Абрамов: "Ғалаба қозонишга интилдик. Бизда йўқ жойдан гол кириб кетиши одатга айланиб қолди. Иккинчи таймда кўп вазиятларга эга бўлдик, аммо уларнинг биттасидан фойдалана олдик. Навбатдаги 2 очкони қўлдан чиқардик".

- Вадим Карленович, сиз хотиржам мураббийлардан ҳисобланасиз. Аммо овозингиз бўғилиб қолганидан баҳс жуда қизиқ ўтганини билиш мумкин. "Динамо" кўплаб вазиятлар яратяпти, аммо гол уришда муаммолар бор.

- Футболда шунақа бўлиб туради. Тўп рақиб дарвозасига киришни хоҳламайди.

- Одатда мухлислар "Пахтакор" билан дуранг бўлса қувонишарди, бугун эса акси.

- Ҳаммамиз хафамиз. Чунки ўйин бўйича 2 очкони қўлдан чиқардик.

- Темиров ва Абдуллаевларнинг ўзгариши нима билан боғлиқ?

- Абдуллаевда 2 кун аввал ангина бор эди. У кучга кирмаганини ўйиндан билиб олдик. Дамир Темиров ҳам баҳсга киришиб кета олмади. Захирадан баҳсга қўшилганлар туфайли устунлик қилишни бошладик.

- Одилбек Абдумажидов майдонга тушиб, Черанга деярли имкон бермади. Бу айнан Драганга қарши амалга оширилган ўзгаришмиди?

- Икки марказий ҳимоячи бироз нотўғри ўйнагани туфайли Абдумажидовни туширдик. Шунчаки Черан билан тўп учун ҳаводаги курашда тўғри ҳаракат қилиш керак эди.

- "Динамо"нинг голидан сўнг Мийич сиз томонга келиб, бир нималар дегандай бўлди.

- У голни нишонлади. Ҳиссиётлар ҳаммада бор.

- "Уйда деворлар ҳам ёрдам беради" дейишади. "Динамо" бугун Самарқандда, ўз мухлислари қаршисида ўйнаганда жамоа ғалаба қозонган бўлармиди?

- Мухлислар билан ўйнасак бу бизга қўшимча ёрдам беради. Сиз ҳақсиз, ишқибозларнинг олқишлари футболчиларга ёрдам беради. Ўз уйимизда қачон ўйнашимизни билмайман.

- "Динамо" раҳбарияти дурангни қандай қабул қилди?

- Дуранг билан қутлашди, аммо биз хафамиз. Мухлислар 1 очкодан ранжишди.

Вадим Абрамов: "Навбатдаги 2 очкони қўлдан чиқардик"