"Нефтчи": Ҳолматовдан ажойиб серия ёхуд "Бухоро" мағлуб этилди

Олий лиганинг 14-турида Фарғонанинг "Нефтчи" клуби ўз майдонида "Бухоро"ни қабул қилди. Учрашув тақдирини 38-дақиқада тажрибали ярим ҳимоячи Акмал Ҳолматов томонидан урилган гол ҳал қилди - 1:0. Шу тариқа, "Нефтчи" мавсумдаги ўзининг 10-ғалабасини қўлга киритди.

Акмал Ҳолматов олий лиганинг охирги 4та ўйинда майдонни голсиз тарк этмаяпти. Футболчи "Андижон", "Олмалиқ", "Қўқон-1912" ва "Бухоро" билан ўйинларда гол уришга эришди.

Ушбу ғалабадан сўнг "Нефтчи" ўз очколарини 32тага етказиб олди ва мусобақа жадвалида 3-ўринга чиқиб олди.

"Навбаҳор": Бу йил биринчи марта 4та гол урдик

Кеча Ғузорнинг "Шўртан" клубини қабул қилган Наманганнинг "Навбаҳор" клуби 4:2 ҳисобида ғалабага эришди.

Бахтиёр Ашурматов бошчилигидаги жамоа 2015 йилги мавсумда илк бор битта ўйинда рақиб дарвозасига 4та гол уришга муваффақ бўлди. Сўнгги бор "лочинлар" ўтган йилнинг 19-турида "Сўғдиёна"га қарши ўйинда 4та тўп киритишганди.

"Навбаҳор" 18 очко билан мусобақа жадвалининг 9-поғонасидан ўрин олди.

"Андижон": Олий лигадаги 300-мағлубиятни Самарқандда қабул қилиб олдик

Самарқандда "Динамо" клуби меҳмони бўлган "Андижон" клуби сафарда 1:2 ҳисобида ютқазиб қўйди.

Ушбу мағлубият водий клубининг олий лигадаги 300-мағлубияти бўлди. "Бургутлар" кеча чемпионатдаги ўзларининг 642-учрашувларини ўтказишди. Шундан 215тасида ғалаба, 127тасида дуранг кузатилган.

"Андижон" ҳисобида ҳамон 11 очко бор ва жамоа 13-ўринни эгаллаб турибди.

"Қўқон-1912": "Сўғдиёна"га яна ютқаздик

Жиззахдаги янги қуриб битказилган стадионда "Сўғдиёна" меҳмони бўлган "Қўқон-1912" жамоаси 1:2 ҳисобида мағлуб бўлди. Нодир Қўзибоев кетма-кет иккинчи турда гол урди, бироқ иккала сафар ҳам жамоа имкониятни бой бериб қўйди.

Ўтган ҳафта кубок баҳсларида айнан "Сўғдиёна"га ютқазиб мусобақани тарк этган қўқонликлар бу сафар ҳам Жиззах клуби олдида ожиз қолишди.

Рустам Абдуллаев бошчилигидаги жамоа 10 очко билан 14-ўринга тушиб қолди.

"Водий футболи": Акмал Ҳолматов 4та ўйиндан буён гол урмоқда