“Бошқача ўйин кутгандик. Биласиз, “Шердор“ ортимизда келмоқда. Сафардаги ўйинда ҳам жуда қийин бўлганди. Ўйиндан ўйинга жамоамнинг савияси ошиб бормоқда. Ютган ўйинларимизнинг ҳам молиявий пуллари йигитларга берилмоқда. Йигитлар нима мақсадда майдонга тушишаётганини билишади. Футбол шундай нарса, майдонга тушдингми, бир мақсад йўлида ҳаракат қилишинг керак. Футболчилар молиявий томондан рағбатлантириб турилса, улардан талаб қилишга ҳам осон бўлади. Футболни алдаб бўлмайди, тўғри ўйнайдиган бўлсак, барчаси яхши бўлади. Машғулотларда йигитларга ҳимоя, ярим ҳимояда қандай ўйнаш, ҳужумга қай тариқа тез ўтишни ўргатяпмиз. Футболда ҳужум қилмасдан гол уриб бўлмайди. Ҳимоя гол ўтказиб юбориши мумкин, аммо ҳужум қилинмаса, албатта мағлуб бўлинади. Шунинг учун ҳам бугун йигитларга кўпроқ тўпни ўзида ушлаб, ҳужумга тезроқ ўтишни кўрсатма бергандим. Агарда мағлуб бўлсак, бизга қийин бўларди. Бироқ ғалабага эришдик. Бизни қўллаб-қувватлаган барчага раҳмат айтаман. Худо хоҳласа, Фарғонадаги ўйинда ҳам чиройли ўйин кўрсатиб, ғолиб бўламиз деган умиддаман. Йигитларга раҳмат айтаман.

Элбек Равшанов “Бухоро“га кетди. Абдурасул Комилов эса бугун Мальдивга учади. Ҳимоячи Абдуғани Камолов эса ўз фикрини ўзгартирди ва жамоада қолди. У “Шўртан“даги рақобатни, ўйин амалиётисиз қолиб кетиши мумкинлигини ўйлади. Бу ерда ҳар доим баҳсларда майдонга тушмоқда. У 2000 йилда туғилган. Бизнинг ишончимизга кириб бўлган.
Аниқ айта олмайманку, бироқ 3-4 янги футболчиларни олиб келамиз. 1999-2000 йилги йигитлардан ва бир нафар тажрибали марказий ҳимоячини трансфер қиламиз. Ҳозир марказий ҳимояда чап қанот ҳимоячиси Мурод Тўйчибоев ва ўнг қанот ярим ҳимоячиси Руслан Вагапов ўйнамоқда. Ҳозир бизга энг керакли футболчи - марказий ҳимоячи.
29 июнда “Ифтихор“ билан ўйнаймиз. У ердан келиб, 30 июнь кунида Тошкентдаги “Тўқимачи“ стадионида “Сўғдиёна“ билан синов-назорат ўйинини ўтказамиз. Яна бир неча ўртоқлик ўйинларини ўтказиш ниятимиз бор“, - деди Воҳид Холбоев.

Миржалол Норматов суҳбатлашди

Воҳид Холбоев: "Шердор" бунчалик тез таслим бўлишини кутмагандим"