1994 йил. Лаудруп "Реал"га ўтган ва кейинги мавсумдаёқ "Барселона"ни тор-мор келтирган

Таркибида Лаудруп бор "Барселона" Кройф қўл остида 4 марта кетма-кет Испания чемпиони бўлди. Аммо ўша вақтлардаги лимит - майдонга бир вақтда фақат учта легионер туша олиши, Куман, Ромарио ва Стоичков борлиги, Микаэльни асосий таркибдан четда қолдирарди. Бир неча йил клуб манфаатлари йўлида ҳаракат қилган, голлар уриб, голли узатмалар етказиб берган ярим ҳимоячи кераксиз бўлиб қолди. Кейинроқ аён бўлдики, ўша афзал кўрилган Стоичков ҳам узоқ қолмади жамоада. Лаудрупни қандай қилиб қўйиб юбориш мумкин эди? Яна бошқа клуб йўқдек "Реал Мадрид"га. Навбатдаги чемпионат "Барса" "қаймоқранглилар"га "бор йўғи" 5:0 ҳисобида мағлуб бўлди ва чемпионликни ҳам Лаудрупга қўшиб бериб юборишга мажбур бўлди.

1997 йил. "Феномен"нинг "туғилишини" ўтказиб юборган "Барселона"

Роналдо футбол тарихида ёрқин из қолдирган. Аммо ўша нур янада ёрқинроқ бўлиши мумкин эди, агар... Агар жароҳатлар унга панд бермаганида. "Барселона" афсонаси бўлиши ҳам ҳеч гап эмасди, аммо бунинг ўрнига битта кучли мавсум ўтказдида кетиб қолди.
Роналдиньо билан «Барселона» жуда вақтида хайрлашди, лекин Роналдо билан вазиятда ошириб юборишганди. "Феномен"ни қолса, яхшироқ бўлишига ишонтира олишмади, «Интер»нинг пулларига учиб, 12 миллионга сотиб олинган ёш футболчини 23 га сотишди. Бир қарашда фойдали трансфер, аммо каталонияликлар кўп нарса йўқотишди. Ахир кетганига ярим йил бўлиб улгурмай Роналдо дунёнинг энг яхши футболчиси деб топилди ва "Олтин тўп"ни қўлга киритди, яна бир йилдан кейин УЕФА Кубоги финалида гол урди жамоаси ғолиб бўлди. Аммо «Барселона» учун эмас.

2000 йил. Луиш Фигу ишонч билан "Барса"ни "Реал"га алмаштирганди

Барселона" учун энг оғриқли жудоликми? Неймаргача аниқ энг ёмони эди, ҳозир билмадим. Ахир "Реал"га ўтганидан кейин Фигу орзу қилганидек Чемпионлар Лигасида зафар қучди, ички чемпионатда Раул ва Зидан билан бир жамоада тенгсиз бўлишди, мамлакат Суперкубогини қўлга киритишди. Бир сўз билан айтганда "Барселона" сардори "Реал"га ўтди ва бу танлови тўғри бўлганлигини, футболчилик фаолиятидаги олға ташланган қадам бўлганини барчага исботлаб қўйди. Барчасига қўшимчасига, Фигу 2000 йил якунлари бўйича "Олтин тўп"га ҳам эга чиқди.

2001 йил. "Барселона" раҳбарлари Гвардиолани "хайдаб солишган"
Хосеп кекса бўрилардан бири эди жамоада, аммо уни турли хил усуллар ёрдамида сиқиб чиқаришди. Энг қизиғи бу ишларни раҳбариятдагиларнинг ўзи амалга оширган. ОАВ ёрдамида "тирноқ остидан кир қидирган" раҳбарлар ахири Гвардиолани ва бош мураббий ван Гални уруштириб қўяди. Испания термаси футболчиси жароҳат олганда клуб президенти ва унинг атрофидагилар сал кам байрам қилишгани ҳақида гаплар юради. Нега улар хурсанд бўлади дейсизми? Яна бироз ҳаракат қилинса, эртага фаолиятини якунлаб раҳбарлардан бирининг курсисига эга чиқиши мумкин бўлган рақибни сотишга имкон туғиларди.

Клуб раҳбарлари Хосепнинг машҳурлигидан хавотирга тушиб қолишганди. Гвардиола "Ювентус"га ўтишга рози бўлди, аммо кўп ўтмай у ердан Анчелоттини хайдаб юборишди, кекса Липпи эса бошқа футболчиларга ишонч билдирди. Якунда Хосеп "Брешия"га бориб қолади. У ерда Маццоне қахрамонимизни мураббийлик сир-асрорларидан хабардор қилишни бошлайди. Яна у ерда Хосеп машҳур Роберто Бажжо билан дўстлашади. Нима бўлганда ҳам, футболчи сифатида ҳам, мураббий сифатида ҳам Гвардиола билан чиройли хайрлашишмади. Аммо ҳар икки сафар ҳам Пеп жимгина кетди, лекин кўп нарсани айтиб ташлаши мумкин эди.

2002 йил. Ривалдо эркин агент сифатида жамоани тарк этган
Бразилиялик яна бир футболчи ўша йили ёзда Жаҳон Чемпионатида тўп тепган. Ва хаттоки тарихдаги энг кучли терма жамоа сафида, асосий таркибида чемпион бўлади. Жамоадоши Роналдонинг голлари эвазига Бразилия Оливер Кан дарвозасини қўриқлаган Германияни мағлуб этди. Жаҳон чемпионини шунчаки текинга қўйиб юборган ҳам ўша раҳбарлар бўлди. Амалдаги Жаҳон чемпиони, "Олтин тўп" соҳиби "Барса", аниқроғи унинг раҳбарларига керак бўлмай қолди.

2009 йил. Самуэль Это'Они Златанга алиштириш

Бу трансферни нафақат раҳбарият балки, янги жамоа қураётган Гвардиола ҳам истаган бўлса ажаб эмас. Сабаби, камерунликнинг характери бошқаларга салбий таъсир ўтказиши ҳеч гап эмасди. Уёғини энди фақат таҳмин қилиш мумкин. Аммо алоҳида олиб қаралса ҳам трансфер омадсиз бўлганди. Самуэль ва яхшигина қўшимча пул эвазига Златан харид қилинган. Якунда эса Ибра енгилмас жамоанинг бир бўлаги бўла олмади. Моуриньо эса Самуэль таркибидаги "Интер" билан ўша "Барселона"ни ортда қолдириб, Чемпионлар Лигасида ғолиб бўлди. Ҳужумчи ўшанда жуда яхши спорт формасида эди. А серияда зафар қучди, Италия Кубоги, Чемпионлар Лигаси ва яна баъзи совринларга эга чиқди. Уни сотиб юборган "Барселона" эса юта олмади.

2013 йил. Эрик Абидалга янги шартнома таклиф қилинмаган
Яхши, ҳеч бўлмаса Чемпионлар Лигаси кубогини боши узра баланд кўтаришга беришди – бу ҳам аслида раҳбарлардан эмас, Пуйолдан чиққан фикр эди чамамда. Бу иши билан жингалак соч Абидаль ҳам аслида буюк сардорлардан бирилигига ишора қилганди. Розель ва унинг ўнг қўли Бартомеу француз эркин агент мақомида жамоани тарк этиши учун қўлларидан келган барча ишни бажаришди.

Абидаль оғир касалликка чалиниб, курашни энди бошлаётганда клубдагилар унга ваъда беришганди, агар футболчи буткул тузалиб, профессионал даражага қайта олса, унга шартнома таклиф қилинади. У уддалади, аммо ўзи сўраган икки йилнинг ўрнига, бир йилга мўлжалланган ва қандайдир бонуслари бор тушунарсиз таклиф тушди. "Монако" Абидални олиб кетди, "Барселона"га эса "кўз тегди". Пуйоль ва Абидаль кетганидан кейин Пикега ишончли шерик ҳамон топилмаяпти. Тўғри Эрик, ҳудди Гвардиола каби "Барселона"ни кечирди ва клуб элчиси бўлишга розилик берди, аммо кўнгилдаги доғ...

2013 йил. "Барселона" сўнгги пайтлардаги энг ёрқин иқтидорини йўқотган

Сўнгги йилларда Алькантарадан кучлироғи чиқмади "Барселона" академиясидан. Андре Гомешни катта пуллар эвазига харид қилишга етган ақл, жамоада турган иқтидорни сақлаб қолишга етмади. Испанияликнинг ўтган мавсумда "Бавария" сафидаги ўйинларини кузатар экансиз, беихитёр шу бола агар тарбияланувчисига кўпроқ ишонч билдирса, "Барса"да янада танилиши мумкин эди деган фикр ўтади. Тьягодан воз кечилаётганда ишонилган Сеск, амалда "Барса" учун кейинги Хави ёки Иньеста бўла олмади. Энди эса Тьяго қайтишни истамаяпти. "Бавария"да Кроос сотиб юборилгани клуб хатоси бўлганидек, "Барселона"да - Алькантара. Тьяго сотиб – Верраттини олиб келишмоқчи эди – ПСЖ шайхларини жахлини чиқариб юборилди – Неймар ПСЖга ўтиб кетиб қолди. Якунда ким ютди?

2016 йилга келиб энди Алвес ҳам ёқмай қолди
Ўнг қанотни тўлиқ ёпа оладиган футболчи чинакамига етишмаяпти "Барселона"га. Битта-иккита ўйинда Серхи Роберто яхши ўйнаши мумкиндир, лекин Алвес кетгач, ўнг қанот ҳувиллаб қолди. Месси марказга ўтиб кетди ва схема аввалгидек иш бермай қўйди. Натижада "Ювентус" ва "Реал" Луис Энрике жамоасини ўз жойига қўйиб қўйишди. Қизиғи, Алвесни қўйиб юборганларидан кейин, бир йил уни ўрнига муносиб номзод қидиришди.

2017 йил. "Барселона" Неймарни олиб қололмади
Агар Испания гранди футболчиси жамоадаги ҳолатдан кўнгли тўлса, ПСЖ қанча бераман деса ҳам, йўқ деб жавоб беради. Роналдо ёки Месси каби.

Демак, асосий гап "Барселона"нинг ўзида, музокара олиб борган вакилларида. Неймар ва унинг отаси пулни яхши кўради? Ахир бу қонунан тақиқланмаганку. Шу ўринда савол туғилади, бразилиялик ўзи қочиб кетдими, ёки "Барселона", яъни Бартомеу футболчини қўлдан бой бердими? Яқин ҳафталар ичида клубнинг "адекват" ишқибозлари аслида Неймар клубга керак бўлмай қолганини, уни яхшигина пулга сотиб тўғри қилингани ҳақида бонг уришади.

Aслида вазият ундай эмаслигини уларнинг ўзлари ҳам тушуниб туришибди. Бир-икки ой аввал клуб мухлислари айнан шу йигитни Роналдога тенглаштираётгандиларку?! Неймар – Лионель ва Криштианудан сўнг, "Олтин тўп"га асосий даъвогар. Маркетинг жиҳатидан ҳам, майдондаги ҳаракатларида ҳам, ёш, иқтидорли ва энг асосийси кучга тўлган. Қандай изоҳ топманг, қандай баҳона тўқиманг, "Барселона"га бундай футболчини, бундай ёшда қўйиб юбориш фойдали эмасди. Рамос ва Карвахаль эртага кечки пайт бразилиялик кетгани шарафига байрам уюштираяпти.

Каталония хатолардан хулоса чиқармайди?

"Барселона" янги юлдуз сотиб олишни кўзлаб, муҳим футболчисини қўлдан бой берди. Ва бунақаси биринчи марта юз бермаяпти.

Энди эса ниятига ета олмаган клуб раҳбарияти Европанинг бошқа клубларидан ПСЖ билан ҳамкорлик қилмасликни сўрамоқда. Лекин қолганлар нега "Барселона"нинг айтганини қилиши керак? Ахир юқоридагиларни инобатга олсак, уларнинг ўзлари ТОП даражада эмаслар. Фигу улардан қочиб "Реал"га ўтди - ваҳоланки, "Барселона" сардори эди у ўшанда. Вазиятни тез англаган Алькантара "Бавария"га борди ва қайтиш ҳақида ўйламаяпти. Жахли чиққан Это'О "Интер"га ўтди ва Чемпионлар Лигасида ғолиб чиқди. Бу рўйхатни узоқ давом эттиришимиз мумкин, аммо...

Неймар ўша рўйхатга кириши учун ҳали кўп меҳнат қилиши ва ПСЖ билан катта натижаларга эришиши лозим. Лекин клуб трансфер, футболчилар билан ҳамкорлик сиёсати аъло даражада йўлга қўйилмаганини Лео Мессининг отаси ҳам кўрсатиб берди. Ва Вальверде "Барселона"си мавсумни омадсиз ўтказсаю, қишда Месси қадрдони Гвардиолага қўнғироқ қилсаю, Пеп аргентиналикни Неймар бекорга Францияга кетмаганини тушунтириб, 2018 йил ёзида "Манчестер Сити"га ўтишга кўндирса, кейин Суарес, ҳудди Лео Неймар учун қилганидек хайрлашув видеоси тайёрлашига тўғри келади. Футбол тарихида бундай трансфер ҳали бўлмаганди. Гап трансфер нархида эмас, дунё футболи грандларидан бири бўла туриб, қанчадан-қанча футболчилар футболкасини кийишни орзу қиладиган "Барселона" ўнлаб сабаблар келтириши мумкин бўлган вазиятда араб шайхларининг оддийгина "ПУЛ" деб аталган қуролига қарши ҳеч нима қила олмади. Верраттига оғиз солиб, французларни жахлини чиқармаслик керакмиди, ўша шартномани янгилаётганда нархни 350 миллион қилиб қўйса бўлмасмиди?

Энди унинг ўрнига Усмон Дембеле келармиш, "Барселона" футболчи билан келишиб қўйганмиш. Унинг аслида кимлиги ҳақида аввалроқ ёзгандик. Тўғри у иқтидорли, умидли ёшлардан, аммо ўйнаб кетишига ким кафолат бера олади?

"Барселона" нечинчи марта муҳим футболчисидан, катта юлдузидан айрилди. Аввалгиларида ёши нисбатан ўтиб қолган футболчилар жамоани тарк этган бўлса, бу сафар эндигина 25 ёшга тўлган йигит кетди.

Гап кетиб қолаётган футболчилардами, ёки нотўғри йўл тутаётган раҳбариятда? Ахир чинакам кучли, гранд жамоа ўз етакчисини пул учун сотиб юбормайди, "Барса"да бу ҳолат бироз бошқачадек.

Хориж сайтлари асосида Нозима Зарипова тайёрлади

Хатоларидан хулоса чиқармайдиган "Барса"