Championat.asia ўтказилган баҳслар асосида тур лауреатларини аниқлади.

"Бунёдкор" посбони Суҳробжон Султонов Championat.asia сайти талқинига кўра 7-турнинг энг яхши дарвозабони деб топилди.

Ўтган турда ҳам энг яхши дарвозабон бўлган Султонов "Сурхон"га қарши баҳсда ҳам кўплаб сейвлар намойиш этди. Гарчи жамоаси мағлуб бўлса-да Султоновни энг яхши деб топдик. Шундай қилиб "Бунёдкор" дарвозабони бу мавсум учинчи марта энг яхши посбон бўлди.

"Андижон" легионери Рубин Хебай Championat.asia талқинига кўра 7-турнинг энг яхши футболчиси дея эълон қилинди.

"Металлург"га қарши баҳсда 3та гол урган ва битта голли узатма берган Хебай жамоасининг йирик ғалабасига катта хисса қўшди. Якунда "Андижон" 5:0 ҳисобида зафар қучди ва 11 йилдан сўнг битта ўйинда 5та гол урди.

"Навбаҳор" ярим ҳимоячиси Остон Ўруновнинг "Турон" дарвозасига урган голи Championat.asia талқинига кўра 7-турнинг чиройли голи (ВИДЕО) деб топилди.

Аутдан ташланган тўпни Абдуҳолиқов Ўруновга қулай тарзда узатиб юборди, у ёғига эса Остон тезкор рейд билан жарима майдонига кириб гол уришга эришди.

Сергей Токов Championat.asia талқинига кўра 7-турнинг энг яхши мураббийи сифатида эътироф этилди.

Пешқадамлардан бири бўлган "Бунёдкор"га қарши баҳсда "Сурхон" 1:0 ҳисобида ғалабага эришди. "Қалдирғочлар"нинг мавсумда илк бор майдонни бошларини эгик ҳолда тарк этишларига сабабчи бўлган Сергей Токов бошчилигидаги мураббийлар штаби энг яхши деб топилди.

Хет-трикка эришган ҳужумчи, мағлуб бўлган дарвозабон, Россиядан қайтган футболчи ва "Сурхон" устози: Суперлигада 7-тур лауреатлари