Хитойда коронавируснинг ўчоғи ҳисобланган Ухань шаҳри клуби "Ухань Залл" 104 кунни мамлакатдан ташқарида ўтказди. Коронавирус сабаб бу жамоа январда Испанияга йўл олиб, ўша ерда ўқув-машғулотларни давом эттираётганди.

Ҳозирги пайтга келиб Хитойда аҳвол анча яхшиланган, карантин қоидалари ҳам бирмунча юмшаган. Шу боис бу жамоа яна Уханга қайтиб келди. Жамоа мураббийлари ва футболчилар тиббий ниқоб таққан ҳолда вокзалдан чиқиб келишди. Уларни бир нечта ОАВ ходимлари ҳамда мухлислар гуллар билан қарши олишди. Ҳатто ишқибозлар жамоа шаънига қўшиқ куйлашди.

Жамоа бош мураббийи Хосе Гонсалес илиқ кутиб олишдан боши кўкка етганини билдирди: "Уч ойдан кўпроқ вақт Испанияда бўлдик. Мана яна Уханга қайтдик. Таассуротлар аъло даражада. Футболчилар ўз уйларини соғиниб қолишганди".

Испаниянинг Малага шаҳрида 104 кун машғулот олиб борган "Ухань Залл" Хитойга қайтгани билан бирданига машғулотларни бошламайди. Балки яқин уч ҳафтани карантинда ўтказади.

Хитой клуби 104 кундан кейин Уханга қайтди