"Қўқон шаҳри ҳокимлигида икки томон расмийлари ва ишбилармон доиралари ўртасида ўтказилган мулоқот чоғида давлатларимиз раҳбарларининг ташаббуслари билан турли соҳаларда ўзаро манфаатли алоқалар ривожланиб бораётгани таъкидлаб ўтилди.
Куйтун шаҳри мэри Альтай Сакен бошчилигидаги делегация аъзолари шаҳримиз ҳокими Маъруфжон Усмонов ҳамроҳлигида "Қўқон-1912" жамоасига қарашли "Марказий" стадионига ташриф буюришди.
"Хитойлик меҳмонлар ўзбек футболининг энг биринчи жамоаси тарихи билан қизиқишди. Жамоа раҳбари Акрамжон Мамадалиев меҳмонларга жамоанинг тарихи ҳамда ушбу кундаги жамоа ҳақида сўзлаб берди. Меҳмонлар футболчилар билан суҳбатлашиб, эсдалик учун суратга тушишди. "Марказий" майдонида Куйтун ҳамда Қўқон шаҳри ҳокимлари ўзаро тўп тепиш бўйича кичик беллашувга киришдилар.
Жамоа раҳбарияти томонидан жаноб Альтай Сакенга меҳмоннинг исми туширилган "Қўқон-1912" формаси ҳамда бошқа эсдалик совғалар тақдим қилинди. Куйтун шаҳри мэрида "Қўқон-1912" жамоасининг тарихи катта таассурот қолдирди.
Ҳар икки ҳокимлар Қўқон ва Куйтун шаҳарлари ўртасида дўстлик алоқаларини ривожлантириш борасидаги меморандумни имзоладилар", – дейилади клуб матбуот хизмати хабарида.
Изоҳлар