Яшнободликлар чемпионат ва Ўзбекистон кубоги баҳсларидаги ёрқин ўйинлари билан кўпчиликнинг эътиборини тортаётгани сир эмас.

Ёзги таътилдан унумли фойдаланишга ҳаракат қилган Азизжон Файзиев шогирдлари мавсумнинг иккинчи ярмига пойтахт вилоятининг Ғазалкент туманида ўтказилган ўқув-машғулот йиғини орқали ҳозирлик кўришди. Оқтошда кечган тайёргарлик босқичидан сўнг, “Яшнобод” жамоаси иккинчи лига вакили “Сергели” футболчилари билан назорат учрашувида (1:2) майдонга тушди. Мазкур ўйинда жамоа мураббийлар штаби ўндан ортиқ янги футболчиларни кўрикдан ўтказишди.

Эътиборлиси, ушбу баҳсни футбол клуби президенти — Яшнобод тумани ҳокими Хожиакбар Тиллашайхов ҳам кузатиб борди. Ўйин тугагач, Хожиакбар Камолиддинович мураббий ва футболчилар билан учрашиб, кейинги режалар ва таклифлар билан ўртоқлашди.

— Футболимизда катта ислоҳотлар амалга оширилаётганидан барчангизнинг хабарингиз бор, — деди туман ҳокими Хожиакбар Тиллашайхов. — “Яшнобод” футбол клубининг ташкил топганига эндигина бир йилдан ошди. Бошқа жамоалардан фарқли ўлароқ, футбол клубимиз олдига туманда миллионлар ўйини — футбол оммавийлигини ошириш, болалар футболини ривожлантириш бош мақсад қилиб қўйилган. Шу мақсадда ёш ва интилувчан мутахассис Азизжон Файзиевни жамоага бош мураббий этиб тайинлаганмиз. Футболда катта ғалаба ва ютуқларни қўлга киритиш маълум вақт талаб қилади. Қолаверса, туманда футбол инфратузилмасини яратмасдан ижобий натижаларга эришиб бўлмайди. Тўғри, катта сармоялар киритиб, юлдуз футболчиларни жамоага жалб этиб, суперлигага чиқиш осон. Аммо бундан кимга фойда?!

“Яшнобод”нинг бугунги таркиби ўзагини асосан 20-22 ёшли футболчилар ташкил этади. Менимча, жамоанинг чемпионат баҳсларининг барқарор ўтказа олмаслигига бу маълум даражада таъсир ўтказмай қолмайди, албатта. Бироқ яшнободликларнинг Ўзбекистон кубоги доирасида ПРО лига вакилларидан биринчи бўлиб, супер лига жамоаси Самарқанд динамочиларини енгиб, мусобақадан чиқариб юборганликлари барчамизни бирдек хурсанд қилади. Олдинда эса янада жиддий рақиб кутиб турибди. Нимчорак финалда яшнободликлар супер лига пешқадами ва амалдаги вице-чемпион — “Пахтакор” жамоаси билан куч синашади. Бу ўйинда қандай натижа қайд этилишидан қатъий назар, “Яшнобод” жамоаси мухлислари футболчиларимизга ишонади ва уларнинг кейинги ўйинларида омад тилайди. Муҳими, бу каби учрашувлар ёш ва умидли футболчилар учун катта маҳорат мактаби вазифасини ўтаб беришига шубҳамиз йўқ.

Молиявий муаммолар ҳозир қайси жамоада йўқ, дейсиз. Туман ҳокимлиги ва хомийлар келгусида “Яшнобод”ни ёлғизлатиб қўймайди. Айни пайтда туманда футбол клуби учун босқичма-босқич замонавий шарт-шароитларга эга стадион ва спорт қароргоҳи қуриш ишлари бошланган. Бу йилги мавсум жамоа раҳбарлари ва аъзолари учун синовлар йили бўлаётганини унутмаслик лозим.

Эслатиб ўтамиз, “Яшнобод” жамоаси чемпионатдаги навбатдаги учрашувини 29 июль куни сафарда “Чиғатой” футболчиларига қарши ўтказса, 4 август куни Ўзбекисон кубоги 1/8 финалида Тошкентнинг “Пахтакор” вакиллари билан куч синашади.

Хожиакбар Тиллашайхов: “Юлдуз футболчиларни жамоага жалб этиб, суперлигага чиқиш осон...”