Келажакда нималар бўлиши мумкинлигини тасаввур қилиб кўрамиз.

Криштиану Роналду – терма жамоа сафида голлар бўйича жаҳон рекордчиси. 40 ёшли Роналду ҳали ҳам халқаро майдондаги фаолиятини давом эттирмоқда. 2021 йил у Эрон афсонаси Али Дайининг (109) рекордини янгилаганди. 2025 йилда Роналду эронликдан сезиларли равишда қочиб кетди, иккинчи ўринга эса Лионель Месси кўтарилиб олди (114 та гол). Лео ҳам яқин йилларда фаолиятини якунлаши сир эмас, аммо Криштиану учун рекордчи мақомини йўқотишга чинакам хавф мавжуд. Сабабчи эса Норвегия ҳужумчиси Эрлинг Холанд. Хўш, тахминларга асосланиб, "Манчестер Сити" форварди Роналдуни қувиб ўтиши борасида ҳисоб-китоб қилиб кўрсак.

Футболчиларнинг ўртача самарадорлигини солиштирамиз. Холанд – монстр, Роналдунинг йўли эса бир мунча қийинроқ

Ишни асосий статистикадан бошласак. Роналду (ҳозир 40 ёшда) Португалия термаси сафида 225 ўйинда 143 та гол урди. Холанд (25 ёшда) Норвегия сафида 46 ўйинда майдонга тушган, лекин 51 та гол уриб улгурди. Ўртача Роналду ҳар ўйин 0,63 та гол урса, Эрлинг – 1,11 та! Бу жаҳон тарихидаги иккинчи кўрсаткич. Унданда яхшироқ кўрсаткич фақатгина даниялик Поуль Нильсенда (1,37 – 38 та ўйинда 52 та гол). Бироқ бу анча аввал бўлган – 1910 – 1925 йиллар оралиғида. Холанднинг ҳозирги рақиблари анча жиддийроқ.

Роналдунинг 25 ёшида бу борадаги графигига назар ташласак. Ҳисоблаймиз: Криштиану 2010 йилга келиб, терма сафида 68 ўйинда иштирок этган ва бор йўғи 22 бор рақиб дарвозасини ишғол этган. Ҳар ўйин ўртача 0,3 тадан гол. Мақтанадиган натижа эмас. Лекин у вақтга келиб у ЖЧ-2006 ҳамда Евро-2004 ва Евро-2008ларда майдонга тушиб улгурганди. Бундан ташқари Роналду билан Португалия мунтазам равишда топ-термаларга қарши ўйнаган.

Келинг, гапимиз исботи сифатида 68 ўйиннинг қанчаси чиндан кучли жамоаларга қарши бўлганини кўриб чиқсак:

Англия – 3 ўйин;

Италия – 2 ўйин;

Нидерландия – 2 ўйин;

Германия – 2 ўйин;

Бразилия – 2 ўйин;

Греция (Евро-2004да ғолиб чиққан терма) – 2 ўйин;

Испания – 1 ўйин;

Франция – 1 ўйин.

Жами: 15 ўйин.

Холанд эса Норвегия термаси либосида бор йўғи 3 та топ-жамоага қарши майдонга тушган: бир мартадан Нидерландия, Испания ва Италияга қарши. Ҳа, анча яхши ўйин кўрсатадиган, ўртамиёна жамоаларга қарши ўйинлар кўп бўлган: Швеция, Туркия, Сербия ва Дания. Бироқ уларга қарши Роналду ҳам ўйнаган. Шунинг учун таъкидлаш лозимки Холанд график бўйича Криштиануни ортда қолдирмоқда, бироқ Эрлингнинг рақиблари ҳам енгилроқ эди.

Шу ўринда Роналдунинг 25 ёшдан кейинги даврдаги статистикасини четлаб ўтиб бўлмайди. Бу даврда у Португалия сафида 157 ўйинда 121 та гол урди. Ўртача 0,8 тадан гол! Холанд шундай темпда самарадорлик кўрсата олармикин?

Холанд Роналдунинг рекордини янгилай оладими? Агар буни уддаласа, неччи йил керак бўлади?

Фараз қилиб кўрсак, Криштиану ЖЧ-2026дан кейин терма жамоадан кетса, куни-кеча Ирландияга қарши ўйинда қизил олгани туфайли кўпи билан яна 11 та ўйинда майдонга тушади.

2026 йилнинг 23-31 март саналарида иккита ўртоқлиқ учрашуви;

2026 йилнинг 1-9 июнь саналарида иккита ўртоқлик учрашуви;

жаҳон чемпионатида 7 та ўйин (гуруҳ босқичида – 2 та ва яна 5 та ўйин – плей-оффда).

Ҳозирги темпда (ўртача ҳар ўйин 0,63 гол) Роналду тахминан яна 8 та гол уради. Демак, Криштиану терма жамоадаги голлари 151 та гол билан тўхтайди. Холанд Норвегия сафида яна 101 та гол уриши талаб қилинади (эслатиб ўтамиз, ҳозир унинг ҳисобида 51 та тўп бор). Ҳар ўйин 1,1 та гол графиги билан тахминан 92 та учрашув керак бўлади.

Норвегия бир йилда нечта ўйин ўтказади? 2024 ва 2025 йилларда жамоа 10 тадан ўйин ўтказди (ёки ўтказади), 2026 йилда – 13 тадан 18 тагача (ўртоқлик учрашувлари + ЖЧ + Миллатлар Лигаси + Евро-2028 саралаши). Келинг, норвегияликлар ЖЧ 1/8 финалигача етиб боришади деб тахмин қилайлик ва унда бизнинг ҳисоб-китобда 15 та беллашув бўлади. Демак, 10+10+15 ва натижани 3 га бўламиз. Натижада, Норвегия 12 ойда 12 та ўйин ўтказиши келиб чиқади. Энди Холанднинг гипотетик рекорди учун керак 92 ўйинни 12га бўламиз. Хулоса: Эрлинг Криштиану натижасини яхшилаш учун тахминан 8 йил керак бўлади. Яъни норвегиялик 33 ёшда (2033 йилда) мутлақ рекордчига айланиши мумкин!

Холандга қандай факторлар ҳалақит қилиши мумкин?

Албатта, материал давомида тахмин қилган рақамларимиз ҳозирча шунчаки фараз. Амалда эса норвегияликнинг рекордни янгилаш йўлида жуда кўплаб факторлар ҳал қилувчи роль ўйнаши мумкин. Улардан энг содда ва оддийси – жароҳатлар. Холанд саломатлигига катта эътибор беради ва уни максимал равишда муҳофаза қилишга уринади. Шунга қарамай, норвегиялик нисбатан кўп жароҳатланмоқда. Нима бўлса ҳам ҳеч ким жиддий жароҳатлардан кафолатланмаган. Бундай бўлишини ҳеч бир футбол мухлиси истамаслиги аниқ, лекин шундай вариантни унутмаслик ҳам зарур.

Шунингдек, Эрлингнинг ўйинида кескин пасайиш кузатилиши мумкин. Ҳа, Роналду 25 ёшдан кейин голлари сонини сезиларли равишда ошира олган. Холандда эса бунинг акси бўлиши ҳам ҳеч гап эмас. Ҳозирча "Манчестер Сити" форварди бундай тахминларга ўрин қолдирмаяпти. Аммо узоқ келажак ҳақида ишонч билан гапириш хато бўлади.

Яна бир муҳим жиҳат – Норвегия терма жамоаси натижалари. Агарда жамоа Европа ва жаҳон чемпионатларига чиқмаса, шу билан бирга қитъанинг топ-жамоалари орасидан муқим ўрин ола билмаса, Холанд ўзининг темпини ушлаб қолиши мушкул бўлади.

Асосийси – бир неча бор таъкидлаганимиздек, буларнинг барчаси фақатгина тахмин, фаразлар. Лекин ҳозирнинг ўзида норвегияликнинг самарадорлигига қойил қолмай илож йўқ!

Холанд Криштианунинг "абадий" рекордини янгилай оладими? Бунга неча йил талаб этилади?