Ўйин ҳақида

— Умуман олганда, кўп ҳолларда ўзимизни йўқотиб қўйдик. Тезкор гол урдик, лекин шунга қарамасдан, ўз дарвозамиздан ҳам тўп олиб чиқдик. Қанотларни бой бердик, айниқса, чап қанотни. Учинчи голдан кейин ўйинни қутқаришга интилдик. Бир нечта вазиятларни яратдик. Ўйлайманки, АГМК ҳақли ғалабага эришди ва олмалиқликлар бунга лойиқ эдилар.

— "Машъал" ўтган турда "Насаф"га, бугун эса АГМК қарши ўйнади. Қайси жамоа сизларга кўпроқ муаммо туғдирди?

— Биз ўз ўйинимизни ҳар бир рақиб жамоага қараб шакллантирамиз. Бошқа тарафдан бир нечта муаммоларимиз бор. Ярим ҳимоя чизиғи бизни хавотирга соляпти. Умуман, ҳозир ҳис-ҳаяжондаман ва аниқ тушунтириб беришим қийин. "Насаф" ҳужумкор жамоа, АГМК ҳам. Албатта, бу жамоаларга қарши ўйнаш мураккаб. Афсуски, ҳозирча омад етишмаяпти.

— Айрим маълумотларга қараганда, қишда Рўзиқул Бердиев "Насаф" билан шартнома тузмагач, қаршиликлар раҳбарияти сиз билан музокара олиб борган экан. Шу ростми?

— Бунақаси мутлақо бўлмаган. Биринчи марта сиздан эшитяпман.

— "Машъал" билан шартномангиз бор. Кейинги мавсумда ҳам жамоада қоласизми?

— Раҳбарият ҳамкорликни давом эттирса, қоламан. Узоқ муддатли келишув бор. Барчаси натижага ва раҳбариятнинг қарорига боғлиқ. Ишим қониқтирса, қолдиришади.

— Абдураимов ва Муртозаевнинг кетиши жамоага қандай таъсир кўрсатди?

— Улар "Машъал" учун қўлдан келганича ўйнашди. Ўйлашимча, футболчилар янги босқичга чиқишни хоҳлашди. Ҳаёт шундай, ҳар бир инсон энг яхшисини излашга, ривожланишга интилади. Абдураимов ва Муртозаев юқори даражадаги ўйинчи эди.

— 6 ўйиндан буён гол уролмаётган Чика Оквара бугун ҳам асосий таркибда майдонга тушди. Муборакда ундан кучлироқ маҳаллий футболчи йўқми?

— Ҳа, унда муаммолар бор, лекин у 2 та гол урган. АГМК стандартларда яхши ўйнайди. Уни қўймасак, бурчак тўплари ва жарима зарбаларида қийналиб қоламиз. Унинг бўйи курашларда фаол қатнашишга ёрдам беради. Узун паслар билан ўйнашда айнан ундан фойдаланишга ҳаракат қиламиз. Ҳар доим ҳам режаларимиз иш бермайди. Албатта, ҳужумчиларга эътирозларимиз бор.

— "Машъал" рақибдан келиб чиқиб ўйин қуришини айтдингиз. Шундай жамоалар борки, ўйинни ўзлари назоратга олишади. Муборак жамоаси қачон ўз ўйинини рақибдан келиб чиқмаган ҳолда, ташкил қилади?

— Ҳозир футбол умуман бошқача ўйналяпти. Илгари ўйин қуришда майдон сифати халақит қиларди. Ҳозир эса майдонлар яхши. Энди характер ва хоҳишдан ташқари техник томонларга урғу бериш керак. "Машъал" рақибдан келиб чиқиб ўйнайди. Қайтараман, ҳужумкор футбол кўрсатишни албатта, хоҳлаган бўлардим. Мухлислар ҳам шуни хоҳлашади. Бироқ мавжуд футболчилардан келиб чиқсак, ҳозирча бунинг иложи йўқ. Умид қиламизки, "Машъал" етакчилик қилган даврлар ҳам қайтади.

Хомяков: "АГМК ҳақли ғалабага эришди"