Руслан Аҳмедов: "Ўйин оғир ўтди, баҳс охирида омадимиз келди. "Локомотив"га қарши учрашувнинг сўнгги дақиқаларида гол ўтказиб юборгандик, бугун ҳам шундай бўлади деб ўйлагандим, лекин йўқ. "Қўқон-1912" ғалабага лойиқроқ эди, биз иккинчи жамоа бўлиб ўйнадик. Қўқонликларга кейинги баҳсларда омад тилайман.

- Футболчиларга ётиб олиш ҳақида кўрсатма бердингизми ёки бу ўйинчиларнинг ўзидан чиққан ғоями?

- Доим шундай саволлар бўлади. Ютаётганингизда ўзингизга шу саволни бериб кўринг. Бу ҳаракатлар ўйин темпини бузиш учун қилинади. Баъзида учрашув охирида футболчиларнинг оёғининг томири тортишиб қолади. Ҳамма ерда натижа учун вақт чўзилади, ҳатто Жаҳон чемпионатида ҳам. Биз вақтни чўзинглар демаймиз. Баҳс охирида футболчилар автоматик бу режимга ўтиб кетади. Менимча, бу футболдаги нормал ҳолат.

- "Хоразм"да ўтган йилгига нисбатан пасайиш бор.

- Шундай, чунки ўтган йилги жамоанинг 80% йўқ. Янги футболчиларга вақт керак. Рокки Марчиано Дубай клубига ўтди, тўрт нафар футболчимиз "Сурхон"да. Хуллас, 80% таркиб ўзгарган.

- Дарвозабоннинг охирги ҳаракатини қандай баҳолайсиз?

- Нотўғри қилди. Футболчимиз ҳиссиётга берилиб кетди. Ҳакам қизил карточка берганини кийиниш хонасига кирганимда билдим.

"Хоразм" устози Руслан Аҳмедов: "Ҳамма ерда натижа учун вақт чўзилади"