Терма жамоамиз бош мураббийи Хосе Мария Мендез Олма-Отага учиб кетишдан аввал сайтимизга интервью берди.

- Йиғинда асосий эътибор нимага қаратилмоқда?
- Ҳозир бизнинг асосий мақсадимиз ва вазифамиз келаси йилнинг февраль ойида бўлиб ўтадиган Осиё чемпионати. Ана шу мусобақага тайёргарлик кўряпмиз, айрим камчиликларни бартараф этишга уринаяпмиз. Шунинг учун ҳам натижа бизни ўйлантирмаяпти. Асосийси ўйинимизни ўстириб бориш.

- Айрим машқларни ўйинчилар тўлиқ тушуниб олишмаяпти. Бунинг сабаби нима?
- Янги машқларни бажараяпмиз. Машқларнинг осон, ўртача ва қийин каби даражалари бўлади. Машқларни “Қайрат” билан ўйинларда синаб кўрамиз, мақсадимиз ўртоқлик ўйинида ютиб келиш эмас, машғулотларда бажараётган нарсаларни амалда синаб кўриш.

- “Қайрат” УЕФА кубогининг амалдаги ғолиби ҳисобланади. Ушбу жамоа билан ўйинлардан ўзимиз учун нималарни олишимиз мумкин?
- Бу иккита ўйин биз учун фойда. “Қайрат” Қозоғистон чемпионатида рақибларини осонгина мағлуб этмоқда, УЕФА кубогини ютиш орқали бу клуб тарихга кирди.
Бундай жамоага қарши ўйинда футзалчиларимиз қайсидир маънода қийинчиликка кўникишади, чунки бу ўйинларда тўп кўпроқ рақибда бўлади. Ўйин давомида хато қилмасликка кўникишади, чунки бундай жамоа хатони кечирмайди. Бундан ташқари, стандарт ҳолатларни амалда синаб оламиз, натижа муҳим бўлмагани сабаб турли хил услубларни текшириб кўришимиз мумкин бўлади.

Агар бу ўйинларда ғалаба қозонсак (лекин бу жуда қийин бўлади), бизга қўшимча куч бағишлайди. Агар юта олмасак, фожиа эмас. Теорияда кўриб чиққан вазиятларимизни амалда қўллашга ҳаракат қиламиз.

Шу тариқа, Осиё чемпионатига қадар ўсиб боришни мақсад қилганмиз.

Толибжон Қосимов суҳбатлашди

Хосе Мария Мендез: "Мақсад – "Қайрат"ни ютиш эмас"