Наманган вилояти, Уйчи тумани жамоасида тайинли раҳбарият ва бош мураббийнинг йўқлиги маҳаллий мухлисларни чуқур изтиробга солмоқда. Хабарингиз бўлса керак, йил бошида “Хотира-79” жамоаси бош мураббий сифатида Нозим Муллаохуновни рўйхатдан ўтказганди. Аммо кейинчалик мураббий у ерда узоқ вақт ишламади ва жамоа лагерини тарк этди. Сўнгра раҳбарият бошқарув постига бунгача эркаклар футболида бош мураббий сифатида ишлаб кўрмаган Науфал Бобоевни олиб келди. Науфал Бахтиёрович мураббий сифатида “Бунёдкор” аёллар жамоасини бошқарганди. Эркаклар футболида ёш мутахассис ўзини кўрсатиш учун астойдил енг шимариб ишга киришганди. Бироқ жамоа ичидаги муҳит Бобоевни ҳам Уйчида узоқ ишлай олмаслигини кўрсатиб берди.

Раҳбарият бўшаб қолган постга яна Муллаохуновни қайтаришни лозим топди. Бироқ мураббийнинг иккинчи қайтиши 2та ўйингача бўлди. Сабаби ушбу мураббий яна жамоага бормай қўйган.

Жамоа футболчилари билан боғланганимизда, ойлик маош тугул на ётоқ, на овқатланиш учун шароит борлигини таъкидлаб ўтишди. Футболчилар ўйин куни тўғри стадионда йиғилади ва тўртта тўпни олиб, бироз “квадрат” ўйнаб, ўйинга киришиб кетади. “Хотира-79”да ўзи биттагина мураббий бор эди. Ҳозир шу ҳам йўқ. Футболчилар ўйинларга мураббийсиз тушмоқда. Раҳбариятда биргина ижрочи сифатида Илҳом Отавалиев қолган.

Юқоридагилардан келиб чиқиб, “Хотира-79”даги вазиятдан ўзингиз учун хулоса чиқариб олиш қийин бўлмаса керак. Кўрамиз, бу ҳолат қачонгача давом этар экан.

“Хотира-79”даги вазиятга ким жавоб беради?!