Айтиш керак, ассоциация вилоят футболига инновацион ғоялар, замонавий иш услубини олиб киришга ҳаракат қилмоқда. Мазкур семинар ҳам шу мақсадда ташкил қилинди.

Жумладан, семинарларда руҳшунос олим Орзу Абдураззоқов “Мураббийларнинг ёш футболчилар билан ишлашда руҳий жиҳатлар роли” мавзусида маъруза ўқиди. Руҳшунос ўз маърузасида асосий урғуни ёш ўйинчилар билан ишлашга, муомалага қаратди. Айнан шу жиҳатлар бўйича бир қатор саволларга жавоб қайтарди. Семинарлар нафақат назарий, балки амалий кўринишда ҳам ўтказилди.

Соғлом овқатланиш спортда, хусусан, футболда муҳим аҳамият касб этади. Айниқса, ёш болаларнинг соғлом, жисмонан бақувват бўлиб ўсишида тўғри овқатланишнинг роли жуда катта. Албатта бунда мураббийларнинг ҳам хизмати беқиёс. Семинарларнинг иккинчи қисми шу йўналишга аталди. Ассоциациянинг маркетинг бўлими тўғри овқатланиш бўйича Европа тажрибасини ўрганиб чиқиб, Россиянинг “Арго” фирмаси вакили Алишер Хўжамқуловни “Футболчиларнинг ўсишида биомаҳсулотлар роли” тўғрисида семинар ўтказишга таклиф қилди. Семинар давомида мутахассис мураббийларга етарлича маълумот бериб, уларнинг билимлари янада ошишига хизмат қилди.

Семинарлар аввалига Янгийўл туманида жойлашган вилоят футбол академиясида фаолият кўрсатаётган мураббийлар учун ўтказилган бўлса, кейин ҳудудлардаги мутахассисларга ташкил қилинди.

Янгийўл туманида мураббийлар учун янги услубдаги семинар ташкил қилинди