Вилоят марказида қад ростлаган муҳташам “Ёшлик” спорт мажмуаси ўйингоҳида ташкил этилган мусобақада воҳанинг 13 та жамоаси қатнашди. Дастлабки босқич ўйинлари 4 гуруҳда олиб борилди. Гуруҳ ғолиблари эса ярим финал жуфтликларини ҳосил қилишди.

Ярим финалнинг дастлабки баҳсида Спорт ўйинлари ва енгил атлетикага ихтисослаштирилган болалар ва ўсмирлар спорт мактабининг “Ёшлик” жамоаси жорий йили бўлиб ўтадиган “Баркамол авлод” спорт ўйинларига тайёргарлик кўраётган “Баркамол авлод-2017” жамоасини 3:2 ҳисобида мағлубиятга учратди. Кейинги учрашувда эса Ҳазорасп туманининг “Жайҳун” жамоаси Урганч шаҳридаги 5-сон футбол бўйича ихтисослаштирилган мактаб-интернати футболчиларини 3:0 ҳисобида енгди.
Натижада, “Ёшлик”(мураббийи Вали Султонов) ва “Жайҳун”(Шоназар Раҳматуллаев) жамоалари ҳал қилувчи учрашувда ўзаро баҳс юритди. Ушбу ўйиннинг асосий вақтида ғолибни аниқлашни имкони бўлмади, 2:2. Қўшимча вақтда бироз фаол ҳаракат қилган В. Султонов шогирдлари рақиблари дарвозасига яна битта тўп киритиб, “Ёшлик” жамоасининг 3:2 ҳисобдаги ғалабасини таъминлашди. Ғолиб жамоа сафидан тўпларни Баҳодир Раҳимов, Темур Бекчанов, Ҳабибулла Матёқубовлар киритишди.

- Жамоамизнинг ютуғидан жуда мамнунмиз, - дейди Спорт ўйинлари ва енгил атлетикага ихтисослаштирилган болалар ва ўсмирлар спорт мактаби директори Жамоладдин АБДУЛЛАЕВ. – Албатта, ушбу муваффақиятда мураббийларимизнинг муносиб ҳиссаси бор. Насиб қилса, мазкур ютуқдан руҳланган ҳолда иқтидорли футболчиларни вояга етказиш йўлидаги изланишларимизни давом эттираверамиз.

Мусобақанинг ёпилиш маросимида “Ёшлик” жамоаси Кубок ва совғалар билан тақдирланди.

Икром ХУДОЙБЕРГАНОВ.

“Ёшлик” жамоаси – Хоразм вилояти ҳокими кубоги соҳиби