CIES халқаро спорт тадқиқот маркази ўз позициясида майдонда ўтказилган дақиқалар бўйича сўнгги беш йилликда етакчи бўлган футболчилар рейтингини тузиб чиқти. Ярим ҳимоячилар орасидаги етакчи А Серия вакили Марко Пароло деб топилди. Шу вақтгача у 14691 дақиқа давомида майдонга тушган (Хавбеклар орасида ундан фақат Даниэль Парехо, Кристиан Эриксен ва Коке кўпроқ ўйнаган).

Ҳозир бу рейтинг ва “Лацио”ни Паролосиз тасаввур қилиш қийин. Агар 2012 йил Пароло “Ювентус” таклифини қабул қилганида балки бу рўйхатдан ўрин ололмаган бўлармиди?! Ўша йили Пароло “Чезена” таркибида қойилмақом ўйин кўрсатганди. Шундан сўнг, ўйинчи кучли марказий ярим ҳимоячи қидираётган Антонио Контенинг эътибори тушди.

“Менга Конте ҳамда “Ювентус” менежерлари қўнғироқ қилди. Мен бу хабарни эшитиб уч кун ухлай олмадим. Кун бўйи бошқа жамоага ўтиш ё ўтмаслик ҳақида ўйладим. Агентим таваккал қилиб кўришим, “Ювентус” — топ даражадаги жамоа эканини кўп бор таъкидлади. Тўғрисини айтсам, рақобатдан қўрқдим. Ўша вақтда “Юве” марказида Маркизио, Погба ва Пирло ўйнарди. Тўғри, ўзимга ишонаман, имкониятларимни юқори баҳолайман. Аммо уларни асосий таркибдан чиқариб юбориш осонмаслигини ҳам яхши билардим”, — дея тан олди Пароло.

Агар Пароло “Кекса синьора”га кетганида, балки ҳозирги ютуқларига эришмаган, эҳтимол бир умр захира ўриндиғида қолиб кетган бўлармиди?! Тўғриси буни тасаввур қилиш, аниқ бир нарса дейиш мушкул. Лекин бир нарсани ишонч билан айтиш мумкин: Бугун эришган нарсаси, “Лацио” мухлисларининг чексиз муҳаббатига ета олмаган бўларди.

Нозима Зарипова таржимаси

"Юве"ни рад этиб, мухлислар муҳаббатини танлаган Пароло