- Зафар ака, “Олмалиқ”нинг Туркия йиғинида асосий эътибор нималарга қаратиляпти?
- Йиғин давомида асосий эътибор тўп билан кўпроқ муомалада бўлишга қаратиляпти. Тўп билан қандай муомалада бўлишга қаратилган машғулотлар анча қизиқарли ўтмоқда. Яна мураббийимиз жисмоний тайёргарлигимиз устида ҳам ишламоқда. Ҳозирча ҳаммаси кўнгилдагидек ўтмоқда.

- Йиғин давомида бир нечта ўртоқлик учрашувлари ўтказиш режалаштирилган. Шулардан дастлабкисида гол киритдингиз...
- Ҳа, чиндан ҳам Арманистоннинг “Пюник” клубига қарши ўтказилган учрашувда гол киритишга муваффақ бўлдим. Бу ўйинда бизда кўплаб вазиятлар бўлди, лекин улардан фойдаланишда хатоларга йўл қўйдик. “Пюник” яратилган 3та имкониятдан 3та гол урди. Бу ўйинда битта гол урганим кам, кейинги учрашувларда бу камчиликни бартараф этишга ҳаракат қиламан.

Иккинчи учрашувда Қозоғистоннинг “Иртиш” жамоасига қарши тўп сурдик. Бу ўйинда жамоамиз анча мазмунли ҳаракат қилди. Мураббийимизнинг ҳам кўрсатган ўйинимиздан кўнгли тўлди, менимча.

Яна йиғин давомида учта ўртоқлик учрашуви ўтказамиз. Бу ўйинларда йўл қўйилган хатолардан керакли хулоса чиқариб майдонга чиқамиз.

- Йиғин давомида ўртоқлик учрашуви ўтказадиган жамоалар номини айта оласизми?
- 23 февраль куни Белоруссия клубига қарши ўйнаймиз. Кейинги ўйинлар ҳақида ҳозирча аниқ маълумот йўқ.

- Ҳозир кўплаб жамоаларимиз хориж йиғинлари давомида ўз таркибларини хорижлик легионерлар билан тўлдириб олишмоқда. “Олмалиқ”қа янги легионерлар келдими?
- Ҳа, таркибимизга легионерлар келиб қўшилган. Бири франциялик, иккинчиси туркманистонлик. Уларнинг жамоада қолиш-қолмасликлари номаълум.

Комилжон Икромов суҳбатлашди.

Зафар Полвонов: “Олмалиқ”нинг Туркиядаги йиғини кўнгилдагидек ўтмоқда”