Хабарингиз бор, ҳар иккала жамоа биринчи турда мағлубиятга учради, шундай экан бу ўйин Уругвай учун ҳам, Англия учун ҳам муҳим.

Мусобақа бошланмасидан олдиноқ “D” гуруҳи мутахассислар томонидан “ўлим гуруҳи” дея эътироф этилганди. Ўтган турда Уругвай кутилмаганда Коста-Рикага ютқазиб қўйганидан сўнг интрига янада кучайди. Англия матбуотида аллақачон ўйиндан олдинги тахминларни ёзиш бошлаб юборилди. Агар инглизлар яна мағлубиятга учрагудек бўлишса, мусобақани тарк этишади. Уругвай эса Англия масаласини ҳал қила олмаса, кейинги турда Италия билан ўйинда яна қийналади.

Англия даслабки учрашувда ўзидан ёмон таассурот қолдирмади. Улар итальянларга муносиб қаршилик кўрсата олишди. Англия ўз ўйинини ўзгартирмаган ҳолда Уругвайни ютиб қўйиши ҳам мумкин. Уругвай эса Коста-Рика билан кечган баҳсда жуда кучсиз кўринди. Улар Англияга қарши бошқача футбол намойиш этмаса бўлмайди.

ЖЧ-2014. “D” гуруҳи. 2-тур
Уругвай – Англия
Сан-Паулу. “Арена Коринтианс” стадиони.
Бош ҳакам: Карлос Веласко (Испания)

Тахминий таркиблар

Уругвай: Муслера — Касерес, Годин, Коатес, А. Перейра — Стуани, Аревало Риос, Диего Перес, К. Родригес — Суарес, Кавани

Англия: Харт — Г. Жонсон, Ягиелка, Кэйхилл, Бэйнс — Жеррард, Хендерсон — Уэлбек, Руни, Стерлинг — Старриж

Жароҳат олган: Лугано (Уругвай)
Дисквалификация: Макси Перейра (Уругвай)

Бугунги беллашувда Уругвайнинг бор умиди Луис Суаресдан. Жароҳат туфайли биринчи учрашувни ўтказиб юборган Суареснинг бугун илк дақиқалардан бошлаб майдонга тушиши кутилмоқда. Англияннг энг катта умиди эса Уэйн Рунидан. Уругвайлик Диего Лугано жароҳати туфайли бугунги баҳсни ўтказиб юборади. Шундай экан, Руни ўзини анча эркин ҳис қилиб тўп тепса керак. Қолаверса, дискавалификацяи туфайли Макси Перейра ҳам ўйинни ўтказиб юборади.

Катта эҳтимол билан Луганонинг майдон марказидаги ўрнини Себастьян Коатес эгаллайди. Ўнг қанотда эса Мартин Касерес тўп тепади. Шунда чап қанотни Альваро Перейро эгаллайди. Англия термаси бош мураббийи эса катта ўзгаришларни амалга оширмаса керак. Алекс Окслейд-Чемберлен жароҳатидан қутулиб машғулотларни бошлаб юборган ва унинг ҳам майдонга тушиши кутилмоқда.

Оскар Табарес (Уругвай термаси бош мураббийи):
“Биз ҳаммасини ўзгартирамиз. Бизга ғалаба керак, Англияга ҳам ғалаба зарур. Ўйин услубимизни ўзгартирсак, Англияни юта оламиз”.

Рой Хожсон (Англия термаси устози):
“Биз Италиядан учралган мағлубиятни таҳлил қилиб чиқдик. Хатоларимиз нимада эканлигини биламиз. Яхши ҳаракат қилсак, Уругвайни енга оламиз”.

Ўзаро учрашувлар - 10та: +4=3-3 13:10

Охирги учрашув: 01.03.2006. Англия — Уругвай 2:1 (Крауч, Жо Коул — Поусо)

Қизиқарли фактлар
- Даниэль Старриж терма жамоасининг охирги тўрт учрашувида 3та гол урди.
- Руни учун бугунги ўйин ЖЧдаги 10-баҳс бўлади. Аввалги тўққизта учрашувда у гол урмаган.
- Уругвайликлар ЖЧнинг охирги тўрт учрашувидан иккитасида қизил карточка олишди.

Х.Холиқов тайёрлади.

ЖЧ-2014. Уругвай – Англия. ПРЕВЬЮ