Лекин, ҳали хулоса чиқаришга эрта. Боиси, олдинда бутун бошли мавсум кутмоқда. Хўш жамоа аъзолари бўлажак беллашувларда хатоларни такрорламасликка ҳаракат қиладими? Биз бу борада жорий йилда ушбу клуб билан шартнома имзолаган Зоҳир Пиримовнинг фикрларига қулоқ тутдик.

“АГМКни тарк этишимга сабаб кўпроқ ўйин амалиётига эга бўлишни истадим. Бош мураббий Миржалол Қосимов билан суҳбатдан кейин шу қарорга келдим. Тўғриси, бу жамоада фаолиятимни катта қисмини ўтказдим. Кетиш оғир бўлди, албатта. Олмалиқ иккинчи уйимдек бўлиб қолган. Аммо, ҳаммаси ҳам ўзимга боғлиқ эмасди. Футболчи учун энг керакли нарса мураббийнинг ишончи деб ўйлайман.

Ўтган мавсумни ёмон бошладик. Иккинчи даврага келиб ўйин сифати анча яхшиланди. Жамоа янги тузилгани учун бироз қийин бўлди. Ўйин тўғри йўлга қўйилса натижа ҳам ўзи келади.

Олдинги йили жароҳат олганим боис биринчи даврада кўп майдонга тушмадим. Иккинчи даврада ҳам кам ўйнадим. “Бухоро” менга бегона эмас. 2017 йил тўлиқ бир мавсум ҳаракат қилгандим. Жамоанинг мухлислари ва ишчилари бари таниш. Менимча, бу ортга ташланган қадам эмас деб ўйлайман. Оптимал спорт формамга тушиб олсам келажакда ҳаммаси яхши бўлади.

Суперлига-2020 тақвими биз учун оғир келганини айтишим мумкин. “Қўқон-1912”, “Пахтакор” ва “Локомотив” билан сафарда ўйнаш ҳамма жамоага қийин саналади. “Шерлар”га қарши баҳсда камида дурангга лойиқ эдик. Ростини айтсам чемпионат бошланишига бир неча куни қолганда барча футбочилар келиб қўшилди. Ҳар қандай жамоани шакллантириш учун вақт керак. Ёмон ўйинчилар йиғилмаган.

Карантинни фойдали томонлари шундаки, кўпроқ оилангиз ва фарзандларингизга вақт ажратар экансиз. Режаларни ўйлаб, хатоларни таҳлил қилиш учун қулай фурсат. Зарари эса чемпионат бошлангач формага кириб олиш қийин кечади.

Ҳа, терма жамоалардаги фаолиятим ҳақида тўхталадиган бевосита БАА билан Олимпияда йўлланмасини қўлдан бой берганимиз эсимда. Ўша учрашувда заҳирада қолгандим. Бари жуда тез содир бўлганди. Иккита голни ўтказиб юборгач шокка тушиб қолдик. Кетидан учинчи гол ва якунда мағлубият. Ўйиндан кейин гап сўзлар тарқалганига муносабатим? Баҳс қанақасига сотилиши мумкин? Олимпиядага чиқиш учун икки жамоада ҳам имконият бир хил эди. Инсон ҳаётида бундай ҳолат бир мартта рўй беради. Ундан фойдаланиб қолиш лозим”, - деди Пиримов.

Абдулазиз Искандаров ёзиб олди

Зоҳир Пиримов: “Футболчи учун энг кераги мураббийнинг ишончидир”