"Salernitana" - "Inter"

Maccoki hali ham jarohatini davolashi bilan band. Shuningdek, Pyontek va Vilenaning bu uchrashuvdagi ishtiroki so'roq ostida. Katta ehtimol hujumda Kastanos va Dia juftligini ko'ramiz.

Shkrinyar va Chalxanoglu bu o'yingacha safga qaytib ulgurishmaydi, ammo Dimarko jamoasiga yordam bera olsa kerak. Hujum borasida Inzagi qanday qarorga kelishi juda qiziq. Chempionlar Ligasi bahsidan oldin murabbiy Lukaku va Lautaroga dam berishi hamda Korrea - Jeko jutfligini maydonga tushirishi mumkin.

"Inter" birinchi davrada "Salernitana"ni osongina mag'lubiyatga uchratgan va bu safar ham favorit. Biroq jamoa hozir Chempionlar Ligasi haqida ko'proq bosh qotirayotgan bo'lsa ajab emas. Qo'shimchasiga, "Salernitana" uchun ham bu o'yin juda muhim. Shu sabab "neradzurri"ga oson bo'lmasligi aniq.

"Lechche" - "Napoli"

Pogranich va Dermaku jarohat sabab, Blin esa diskvalifikaciya tufayli jamoadoshlariga yordam bera olmasliklari aniq. Marko Baroni o'zi shundoq ham oxirgi vaqtlar samaradorlik borasida oqsayotgan hujum chizig'i borasida yaxshigina bosh qotirishi zarur.

Viktor Osimxen hamon lazaretda. Bu esa Simeone uchun yana bir imkoniyat degani. Balki Spalletti Chempionlar Ligasi o'yinidan avval etakchilardan yana kimgadir dam berishi mumkin. Bunday vaziyatda esa Demme va Ndombelening maydonga tushish ehtimoli ancha oshadi.

Birinchi davrada Neapolda jamoalar murosa ko'chasini tanlagan 1-1, lekin unda, 4-turda "Napoli" hozirgidek zo'r formaga kirib ulgurmagandi va aksincha, "Lechche"ning ishtiyoqi hozirgidan yuqoriroq holatda edi. Spalletti shogirdlari "Milan"dan qabul qilingan mag'lubiyat fonida jamoadagi pasayish haqida ko'paygan gap so'zlar noto'g'riligini isbotlashga urinishi aniq.

"Milan" - "Empoli"

Milanliklarga Kalyulyu va Zlatan yordam berolmasligi aniq, Messias esa safga qaytgan va asosiy tarkibda tushishga tayyor. Shuningdek, yosh De Kattelare ham asosiy tarkibdan joy olishi mumkinligi haqida xabarlar bor. Hujumda esa Jiru va Leaoga aytarli o'rinbosar yo'q.

Mehmonlar safida kiper Vikario jarohatlangan Avvalgi o'yindagi qizil sabab Tonelli bahsni tribunadan tomosha qilishga majbur. Hujumda esa Kaputo va Satriano hamda ularga yaqindan yordam beradigan Balzani jangga tayyor.

"Milan" birinchi davra bahsida 3-1 hisobida zafar quchgan. Jamoa hozir ham favorit hisoblanadi. "Napoli" ustidan qozonilgan yirik g'alaba "rossoneri"ga qo'shimcha kuch bergani aniq. Shunday ekan jamoa navbatdagi g'alabani rasmiylashtirishi ilinjida va "Empoli" vakillari bunga qarshilik qilishi qiyin bo'lsa kerak.

"Lacio" - "Yuventus"

Diskvalifikaciyadan keyin Marushich asosiy tarkibga qaytadi, ammo Chiro Immobilening holati u qadar yaxshi emas. Hujumda uning o'rnini Pedro egallashi mumkin. Ispaniyalik futbolchiga Felipe Anderson va Cakanya yordamlashadi. Qolgan chiziqlarda esa Sarridan bunday muhim pallada kutilmagan qarorlarni ko'rmasak kerak.

Kubok bahsidan so'ng Allegri malum o'zgarishlar qilishi turgan gap. Di Mariya va Vlaxovich asosiy tarkibga qaytsa kerak. Bonuchchi va Pogba umumiy guruhda mashg'ulotlarni o'tkaza boshlagan, lekin bu futbolchilarning maydonga qaytishi uchun yana biroz vaqt talab qilinadi.

"Yuventus" o'tgan o'yinda rimliklarni 3-0 hisobida mag'lubiyatga uchratgan. "Keksa sinora" o'shanda daxshatli sport formasida edi, "Lacio" esa aksincha edi. Hozir esa mutaxassislar mezbonlarga ko'proq ishonmoqda. Eslatib o'tish lozim, "Lacio" hozirda 2-pog'onada va "Napoli"ga eta olmasada, shu o'rnini saqlab qolishga astoydil kirishgan. Shunday ekan, bizni tomoshabop bellashuv kutib turganiga ishonsak bo'ladi.

Sergey Rumyancev

Nozima To'xtamirzaeva tarjimasi

A Seriya 29-turida bizni nimalar kutyapti?