Pro ligada peshqadam bo'lib turgan yaypanliklar keyingi bahslarga puxta hozirlik ko'rmoqda. Jamoa 16 iyul kuni "Lokomotiv"ga qarshi nazorat uchrashuvida maydonga tushadi. Ushbu jarayonlar xususida jarohatdan so'ng tiklanish bosqichini o'tkazayotgan Abdug'ani Kamolovning fikrlari bilan qiziqdik. Futbolchi dastlab mavsum startidagi o'yinlari va jarohati haqida to'xtalib o'tdi.

- Avvalambor barcha yurtdoshlarimizni qurbon xayiti bilan chin qalbimdan tabriklayman. Joriy mavsum jamoam, qolaversa o'zim uchun ham yomon boshlanmadi. Shukurki, tanaffusga birinchi o'rin bilan yo'l oldik. Jarohatga kelsak, 7-turda "Yangier" bilan uchrashuvda jarohat orttirdim. Jarohatim bundan yomon bo'lgani yo'q. Ayni paytda tiklanish mashqlarini olib boryapman. O'ylaymanki, tez orada maydonga qaytaman.

Suhbat davomida "Turon" tomonidan qanday amaliy yordam ko'rsatilgani va davolanishda klubning o'rni haqida ham so'radik. Nima uchun jarohatdan qaytayotgan futbolchilardan bu haqida so'rayapmiz, zero mazkur jarayonda o'yinchisini etiborsiz qoldiradigan klublar ham yo'q emas...

- Buning uchun "Turon" klubi rahbarlariga minnatdorchilik bildirmoqchiman. Bir hafta davomida Toshkentdagi travmatalogiya insitutida jarrohlik amaliyotini o'tkazdim. Klub barcha kerakli narsani etkazib berdi. Moddiy tomondan ham Harajatlarni o'zlari qoplashdi.

Tiklanish vaqtida jismoniy tayyorgarlik bo'yicha mutaxassislarning o'rni kattadir. Bunday pallada Birgina noto'g'ri qilingan harakat keyinchalik qimmatga tushishi mumkin. "Turon"da faoliyat olib borayotgan asli kelib chiqishi latviyalik bo'lgan Vadim Barnich borasida Abdug'ani Kamolovning fikrlari quyidagicha bo'ldi.

- U o'z ishining ustasi desam mubolag'a bo'lmaydi. Hozirda ham mashg'ulotlarni Vadim Barnich qo'l ostida o'tamoqdaman. U jamoaga kelgan ilk kundanoq ovqatlanishga alohida etibor bera boshladi. Pavloni esa haftada bir marotaba istemol qilamiz.

Suhbatdoshimiz turnir jadvali haqida gapirar ekan bundan buyon bo'shashmaslikni takidladi.

- Hali mavsum oldinda. Har bir o'yinga finalga chiqqandek munosabatda bo'lishimiz kerak. "Turon"da juda yaxshi jamoa shakllangan. Barcha aka-ukadek. Xudo xohlasa "Turon" shu yil Superligaga qaytadi, degan umiddaman. Oldinda yanada qiyin o'yinlar kutib turibdi. Yaxshiroq tayyorgarlik ko'rish maqsadida Tojikistonning "Bahoriston" bazasida shug'ullanyapmiz. Barcha sharoitlar yaratilgan. Barchaning kayfiyati alo darajada. Kuniga ikki mahaldan mashg'ulotlarni olib boryapmiz.

"Turon"da bir nechta gollarga assistentlik qilgan Abdug'ani Kamolov avvalgi jamoalarida nima etishmagani va yozgi transferlar borasida shunday javob qaytardi.

- O'yin amaliyoti etarli bo'lmagan. Deylik "Andijon"da 8-turga qadar o'yin qaydnomasiga kiritilmagandim. Yorqin Nazarov bosh murabbiy bo'lgach barqaror o'ynashni boshladim. Shu inson tufayli katta futbolga kirib kelganman. Ularga katta rahmat aytaman. Yozgi transferlar oynasi vaqtida katta xaridlar ko'rmaymiz, deb o'ylayman. "Neftchi" bu borada faol bo'lishi mumkin.

Abdug'ani Kamolov: "Neftchi" yozgi transferlarda faol bo'lishi mumkin. Xudo xohlasa "Turon" shu yili Superligaga qaytadi"