Про лигада пешқадам бўлиб турган яйпанликлар кейинги баҳсларга пухта ҳозирлик кўрмоқда. Жамоа 16 июль куни "Локомотив"га қарши назорат учрашувида майдонга тушади. Ушбу жараёнлар хусусида жароҳатдан сўнг тикланиш босқичини ўтказаётган Абдуғани Камоловнинг фикрлари билан қизиқдик. Футболчи дастлаб мавсум стартидаги ўйинлари ва жароҳати ҳақида тўхталиб ўтди.

- Авваламбор барча юртдошларимизни қурбон хайити билан чин қалбимдан табриклайман. Жорий мавсум жамоам, қолаверса ўзим учун ҳам ёмон бошланмади. Шукурки, танаффусга биринчи ўрин билан йўл олдик. Жароҳатга келсак, 7-турда "Янгиер" билан учрашувда жароҳат орттирдим. Жароҳатим бундан ёмон бўлгани йўқ. Айни пайтда тикланиш машқларини олиб боряпман. Ўйлайманки, тез орада майдонга қайтаман.

Суҳбат давомида "Турон" томонидан қандай амалий ёрдам кўрсатилгани ва даволанишда клубнинг ўрни ҳақида ҳам сўрадик. Нима учун жароҳатдан қайтаётган футболчилардан бу ҳақида сўраяпмиз, зеро мазкур жараёнда ўйинчисини эътиборсиз қолдирадиган клублар ҳам йўқ эмас...

- Бунинг учун "Турон" клуби раҳбарларига миннатдорчилик билдирмоқчиман. Бир ҳафта давомида Тошкентдаги травматалогия инситутида жарроҳлик амалиётини ўтказдим. Клуб барча керакли нарсани етказиб берди. Моддий томондан ҳам Ҳаражатларни ўзлари қоплашди.

Тикланиш вақтида жисмоний тайёргарлик бўйича мутахассисларнинг ўрни каттадир. Бундай паллада Биргина нотўғри қилинган ҳаракат кейинчалик қимматга тушиши мумкин. "Турон"да фаолият олиб бораётган асли келиб чиқиши латвиялик бўлган Вадим Барнич борасида Абдуғани Камоловнинг фикрлари қуйидагича бўлди.

- У ўз ишининг устаси десам муболаға бўлмайди. Ҳозирда ҳам машғулотларни Вадим Барнич қўл остида ўтамоқдаман. У жамоага келган илк кунданоқ овқатланишга алоҳида эътибор бера бошлади. Павлони эса ҳафтада бир маротаба истеъмол қиламиз.

Суҳбатдошимиз турнир жадвали ҳақида гапирар экан бундан буён бўшашмасликни таъкидлади.

- Ҳали мавсум олдинда. Ҳар бир ўйинга финалга чиққандек муносабатда бўлишимиз керак. "Турон"да жуда яхши жамоа шаклланган. Барча ака-укадек. Худо хоҳласа "Турон" шу йил Суперлигага қайтади, деган умиддаман. Олдинда янада қийин ўйинлар кутиб турибди. Яхшироқ тайёргарлик кўриш мақсадида Тожикистоннинг "Баҳористон" базасида шуғулланяпмиз. Барча шароитлар яратилган. Барчанинг кайфияти аъло даражада. Кунига икки маҳалдан машғулотларни олиб боряпмиз.

"Турон"да бир нечта голларга ассистентлик қилган Абдуғани Камолов аввалги жамоаларида нима етишмагани ва ёзги трансферлар борасида шундай жавоб қайтарди.

- Ўйин амалиёти етарли бўлмаган. Дейлик "Андижон"да 8-турга қадар ўйин қайдномасига киритилмагандим. Ёрқин Назаров бош мураббий бўлгач барқарор ўйнашни бошладим. Шу инсон туфайли катта футболга кириб келганман. Уларга катта раҳмат айтаман. Ёзги трансферлар ойнаси вақтида катта харидлар кўрмаймиз, деб ўйлайман. "Нефтчи" бу борада фаол бўлиши мумкин.

Абдуғани Камолов: "Нефтчи" ёзги трансферларда фаол бўлиши мумкин. Худо хоҳласа "Турон" шу йили Суперлигага қайтади"