Ushbu turda Quvasoyning "Cementchi" jamoasi o'z uyida Termizning "Surxon" klubini qabul qildi va 2:0 hisobida g'alaba qozondi. Ushbu uchrashuvdan so'ng "Cementchi" jamoasi bosh murabbiyi Abdumalik Hakimov o'z fikrlari bilan o'rtoqlashdi.

"Biz chempionat davomida juda ham qiyin bo'lgan marafonda g'olib bo'ldik, desam xato bo'lmaydi. Sababi bu yil oliy liga yo'llanmasini qo'lga kirataman degan jamoalar ko'p edi. "Cementchi", "Surxon", "Andijon", "Istiqlol" va "Norin" jamoalari elitaga chiqish uchun kurash olib borishdi. Avvalgi turda chempionlik va oliy liga yo'llanmasini naqd qilganimiz uchun bu safar futbolchilar yig'ib olish biroz qiyin bo'ldi. Shunday bo'lsada muxlislarimiz ko'z o'ngida g'alaba qozonishga erishdik. Birinchi liga chempioni bo'lish ham boshqa ekan. Ichimdagi xis-tuyg'ularni ifodalash juda ham qiyin.

Futbolchilik faoliyatimda "Qo'qon-1912" jamoasi bilan birinchi ligadan oliy ligaga chiqqanman. Unda boshqacha edi. Futbolchi bo'lib oliy ligaga chiqish boshqa murabbiy sifatida chiqish boshqa. Chunki murabbiylik juda ham qiyin ish. Kelasi yili oliy ligada raqobatbardosh jamoa bo'lishga harakat qilamiz va 1, 2 yil ichida oliy o'rinlar uchun kurash olib boradigan jamoa bo'lamiz. Futbolchilarimiz mehnat qilishdan to'xtashmasin, bundan ham katta muvaffaqiyatlarga erishishsin. Bizni qo'llab-quvvatlab turgan muxlislarimizga ham katta rahmat aytaman", - deydi Abdumalik Hakimov

Xojiakbar Jabborov suhbatlashdi

Abdumalik Hakimov: "Qiyin bo'lgan marafonda g'olib bo'ldik"