Ушбу турда Қувасойнинг "Цементчи" жамоаси ўз уйида Термизнинг "Сурхон" клубини қабул қилди ва 2:0 ҳисобида ғалаба қозонди. Ушбу учрашувдан сўнг "Цементчи" жамоаси бош мураббийи Абдумалик Ҳакимов ўз фикрлари билан ўртоқлашди.

"Биз чемпионат давомида жуда ҳам қийин бўлган марафонда ғолиб бўлдик, десам хато бўлмайди. Сабаби бу йил олий лига йўлланмасини қўлга киратаман деган жамоалар кўп эди. "Цементчи", "Сурхон", "Андижон", "Истиқлол" ва "Норин" жамоалари элитага чиқиш учун кураш олиб боришди. Аввалги турда чемпионлик ва олий лига йўлланмасини нақд қилганимиз учун бу сафар футболчилар йиғиб олиш бироз қийин бўлди. Шундай бўлсада мухлисларимиз кўз ўнгида ғалаба қозонишга эришдик. Биринчи лига чемпиони бўлиш ҳам бошқа экан. Ичимдаги хис-туйғуларни ифодалаш жуда ҳам қийин.

Футболчилик фаолиятимда "Қўқон-1912" жамоаси билан биринчи лигадан олий лигага чиққанман. Унда бошқача эди. Футболчи бўлиб олий лигага чиқиш бошқа мураббий сифатида чиқиш бошқа. Чунки мураббийлик жуда ҳам қийин иш. Келаси йили олий лигада рақобатбардош жамоа бўлишга ҳаракат қиламиз ва 1, 2 йил ичида олий ўринлар учун кураш олиб борадиган жамоа бўламиз. Футболчиларимиз меҳнат қилишдан тўхташмасин, бундан ҳам катта муваффақиятларга эришишсин. Бизни қўллаб-қувватлаб турган мухлисларимизга ҳам катта раҳмат айтаман", - дейди Абдумалик Ҳакимов

Хожиакбар Жабборов суҳбатлашди

Абдумалик Ҳакимов: "Қийин бўлган марафонда ғолиб бўлдик"