Bugun o'tkazilgan qura tashlash marosimidan so'ng terma jamoa muxlislar klubi etakchisi Abdurahmon Fozilovning fikrlari bilan qiziqdik.

- Qura natijalari haqida fikringiz?
- Qura hamma uchun birdek keldi deb hisoblayman. Guruhdan chiqish masalasida muammo bo'lmasa kerak deb o'ylayman. Jamoa yaxshi shakllanishi uchun terma jamoalar markazi o'rtoqlik uchrashuvlarini tashkil etishi shart.
KXDR, Saudiya Arabistoni va Xitoy termalaridan 2015 yil yanvar oyida eng optimal formadagisi bu Saudiya Arabistoni bo'ladi.

Bu musobaqada muxlislarga juda ko'p noqulayliklar bo'ladi. O'zbekiston terma jamoasi muxlislari misolida o'ylab ko'ring. Birinchi o'yin Sidneyda, keyin 600 kilometr uzoqlikdagi Bresbenga boriladi, undan keyin 1300 kilometr uzoqdagi Melburnga.

Agar guruhdan chiqish-chiqmaslik masalasi uchinchi o'yinga qoladigan bo'lsa, birinchi yoki ikkinchi o'rinni egallashimizga qarab Melburnda qolamiz yoki yana 1300 kilometrga Brisbenga qaytamiz. Avstraliya shunaqangi mamlakatki, hech qachon hech bir mehmonxonada 2-3 tadan ko'p bo'sh o'rin topilmaydi.

Bu bor yo'g'i mehmonxona masalasi, 1300 kilometrga avtobusda borish bir azob. Shuning uchun o'rtada aviachipta masalalari ham bor.

Bu birgina bizning muxlislarga emas, balki barcha terma jamoalar muxlislariga taalluqli muammo.

- Avstraliyaga taxminan necha kishi borishi mumkin?
- May oyida o'zim yashil qitaga borib tashkiliy masalalarni hal qilib kelaman. Undan keyin narx va boruvchi muxlislar soniga aniqlik kiritamiz.

- Federaciya tomonidan muxlislar klubi azolariga qo'shimcha yordam bo'ladimi?
- Albatta.

- Avstraliyada narx-navo qimmat ekanligi muxlislarning sonini Qatardagidan kamaytirib yubormasmikin?
- Haqiqatdan ham Avstraliyada bir kunlik harajatlar minimum 50$ni tashkil qiladi. Lekin, bu o'zbek muxlislarini to'xtata olmaydi.

- U erga boradigan muxlislar bilan har o'yinimizda qandaydir kutilmagan ko'rinishlar qilishga harakat qilasizlarmi?
- Nasib qilsa, siz kutgandanda xayratlanarli, butun Osiyoni lol qoldiradigan ishlar qilamiz.

Tolibjon Qosimov suhbatlashdi

Abdurahmon Fozilov: "Osiyo Kubogida hammani lol qoldiradigan ishlar qilamiz"