Matbuot anjumanining ikkinchi qismida "Obod" bosh murabbiyi Andrey Demchenko savollarga javob qaytardi.

- G'alaba qozonmas ekansan, hatto jurnalistlar ham kamayib ketadi, - deya so'z boshladi ukrainalik mutaxassis. - Futbolda hamma narsa natijaga bog'liq: hayot, oila, mashg'ulot, rahbariyat munosabati. Yutsang zo'r, yutqazsang muammolar kelib chiqaveradi. Endi o'yin haqida gapiradigan bo'lsam, futbolchilarimiz qandaydir chuqurlikka tushib qolgandek bo'lishdi. Balki ularni Qo'qondagi mag'lubiyat tushkunlikka tushirib qo'ygandir. Natijada ikkita oddiy golni o'tkazib yubordik. Futbolchilarda hayajon bor va buning tasirida o'yin tizgini qo'ldan chiqarildi. Lekin ikkinchi taymda ko'rdik, bizda kuch bor, yo'qsa ikkita gol ura olmasdik.

- O'tkazib yuborilgan gollarda kim aybdor: darvozabonmi yo himoya chizig'imi?
- Gollar odatda elementar xatolardan boshlanadi va bunda hammani ayblash mumkin. Bitta xato zanjirdek bir-biriga bog'lanib yakunda golga olib kelishi mumkin. Darvozabon esa xalqaning oxirgi tugmasi hisoblanadi.

- Sizningcha, jamoa o'syaptimi?
- Avvalgi ikkita o'yinda gol ura olmagandik, bugun esa uddasidan chiqdik. Shuni aytishim mumkin, biz to'g'ri yo'ldamiz. Jamoa o'syapti, lekin natija ko'rsatish uchun bizga vaqt kerak.

- "Buxoro" "Obod"dan qaysi tomonlama kuchli ko'rindi?
- Ularda o'yin yaxshi qo'yilgan ekan, hozircha o'zimiz haqida bunday deya olmayman.

- O'zbekistonga kelib uchta o'yin o'tkazdingiz va uchalasida ham mag'lub bo'ldingiz. "Obod" boshqalar oldida rostan kuchsizmi?
- Futbolda hamma statistikaga qarab baho beradi. Odamlarda uchta o'yin - uchta mag'lubiyat, demak "Obod" kuchsiz ekan tasavvur bo'lishi mumkin. Lekin shuni ishontirib aytamanki, biz hech kim uchun sovg'a bo'lmaymiz.

- Yaqinda milliy terma jamoamizning o'yinlari tufayli oliy ligada tanaffus yuzaga keladi. Bu jamoangiz uchun foydali bo'lishi mumkinmi?
- Hozirgi holatda tanaffus bizga foyda beradi deb o'ylayman, chunki jamoani ikkinchi davra boshlanishiga o'n kun qolganida tuzdik va futbolchilar bir-birlarini tushunib ketishi uchun vaqt kerak. Uchib ketayotgan samolyotni to'xtatib tamirlashning iloji yo'q, uni avval erga qo'ndirish kerak. Tanaffus ham biz uchun erga qo'nadigan payt bo'ladi va o'z kamchiliklarimizni bilib olamiz.

- Balki "Obod"ning tavakkal o'ynagani maquldir, o'xshasa o'xshadi - o'xshamasa yo'q.
- Shunchaki omad kelib qolar degan manoda to'p tepishdan foyda yo'q. Jamoa har qanday holatda ham o'z uslubiga tayangan holda harakat qilishi kerak. Poydevor bo'lmasa uy tez yiqiladi, futbolda ham shunday. Umid qilamanki, bitta g'alabaga erishsak hammasi joyiga tushadi.

X.Xoliqov.

Andrey Demchenko: "Agar bitta o'yinni yutsak hammasi joyiga tushadi"