"Бугун ҳар томонлама оғир ўйин бўлди. Ҳам ўйин борасида, ҳам таркиб борасида. Сафар ўйинларида рақиблар бизга жуда катта қаршилик кўрсатишади. "Сепахон"га қарши ўйинда катта куч йўқотдик ва бир неча футболчиларимиз жароҳат олишди. Шу боис бугун қолган футболчиларга имкон бердим. "Сўғдиёна" жамоасининг ҳаракатлари менга ёқди. Бизга ишонч ва куч етишмади. 1:1 ҳисоби бизни қониқтирмайди, аммо бу футбол", - дейди Микляев.

- "Локомотив" гол урган вазият ҳақида нима дея оласиз?
- Мени фикримча биз барча қоидага мос равишда гол урдик. Жиддий тўқнашув бўлганида фейр-плейга амал қилинса бунга қўшиламан. "Сўғдиёна" футболчиси нима учун атайин тўпни ташқарига чиқариб юборди? Ҳакам агар жиддий тўқнашув бўлса ўйинни тўхтатади. Биз гол уришимиз керак эди. Мен ўз шогирдларимга ҳар бир вазиятни охиригача ўйнашга ўргатаман. Биз "Локомотив"миз, биз охиригача ўйнаймиз. Ўша вазиятда қоида бузилиши бўлмагандику? Агар биринчи бўлимни эсласангиз Тимур Ғаниев 15-дақиқадаёқ вақтни чўзишни бошлаб юборди. Майли Ғаниев жамоадоши жароҳат олгани туфайли тўпни аутга чиқариб юборди, нима учун узоққа эмас ёнига ташлаб қўйди?

- Сиз бош мураббийсиз. Нима учун майдон четида бошқа мураббий кўрсатма берди?
- Чунки у жисмоний тайёргарликка жавоб беради.

- Бугунги ўйинда нимани ўзгартирган бўлардингиз?
- Таркибимиздаги футболчиларни даволаган бўлардим (кулади). Бугун ёшлар ўйнашди. "Сўғдиёна" бизга етарли қаршилик кўрсатди. Бугун бизга куч етишмади, 3 кун олдин "Сепахон"га қарши ўйнагандик. Йигитларга чарчоқ сезилиб қолди. Биз бугун жуда кам голли вазият яратдик.

"Локомотив" матбуот хизмати

Андрей Микляев: "Биз голни барча қоидаларга мос равишда урдик"