Uchrashuvdan keyingi matbuot anjumanida mezbonlar bosh murabbiyi Anvar Berdiev ishtirok etdi.

O'yin haqida

- Juda qiyin o'yin bo'ldi. Avval takidlaganimdek, Pro ligada o'tkinchi o'yinlar qolmagan. O'z muxlislarimiz qarshisida qiyin va muhim bo'lgan g'alabani qo'lga kiritdik.

- “Yangier” darvozasini ishg'ol qilgan Sergey Morozov avvalgi bahsda zaxirada qoldirilgandi. Bunga nima sabab bo'lgandi?

- Tarkibdagi barcha futbolchilar men uchun birdek. “Mashal”ning imkoniyatlarini bilganim sababli, Morozovni zaxirada qoldirgandim. “Yangier” bilan bellashuvda u asosiy tarkibda maydonga tushdi va ajoyib o'yin ko'rsatdi. Bir so'z bilan aytganda Morozov jamoaga kerakli futbolchi hisoblanadi. Shaxsan men uning harakatlaridan qoniqish hosil qilmoqdaman.

- Oxirgi o'yinlarda Abdurashidov va Abduraimov o'yinida pasayish kuzatilayotgandek. Yoki ularda jarohat bormi?

- Bilasizmi, Abduraimovga kelsak, jarohatdan endi tuzalib safga qaytdi. “Mashal” bilan bellashuvda ham jarohati bilan oxirigacha o'ynadi. “Yangier”ga qarshi uchrashuvda ham og'riqni his qilgan holda harakat qildi. Men Abdurashidov va Abduraimovning harakatlaridan qoniqdim.

- Jamoa navbatdagi uchrashuvga qadar 3 kun bor. Bu vaqt davomida jamoangizni tiklanishi uchun etarli vaqtmi?

- Ha, albatta, 10 sentbr kuni o'ynaymiz. Murabbiylar shtabi bilan ortda qolgan bahsni tahlil qilib, tayyorgarlik ko'ramiz.

- Jamoa “Andijon” bilan uch marotaba o'ynadi va hammasida mag'lub bo'ldi. Keyingi bosqichda ham ushbu jamoaga qarshi to'p tepadi. Balki shu o'yinlarda “Turon” raqibini mag'lubiyatga uchrata oladimi?

- Bilasizmi, har bir o'yin tarix deyish mumkin. Chindan ham “Andijon”ga qarshi o'tkazilgan bellashuvlarda yutqazdik. Oldinda yana ikki bor to'qnash kelamiz va ularda muvaffaqiyat qozonishga urinamiz. Biz kimga qarshi o'ynashimizdan qatiy nazar, astoydil tayyorgarlik ko'ramiz. U xoh “Andijon” bo'lsin, xoh boshqasi. Raqiblarni hurmat qilgan holda tayyorlanamiz.

- Ijtimoiy tarmoqlarda “Lokomotiv” futbolchisi Kaxi Maxaradze kelishilgan o'yinlarda aralashib qolgani aytilmoqda. Bunga munosabatingiz qanday?

- To'g'risi, bu narsa futbolchining vidjoniga bog'liq. Bu halol pul topish emas. Men buni qoralayman va uni hazm qila olmayman. Aytaylik, shuni ortidan yaxshi pul topdi, lekin boshqa tomondan u yanada katta bo'lib chiqib ketadi. Bu mening shaxsiy fikrim. Bu narsalar ularning o'zlari javob berishsin. “Lokomotiv” rahbariyati buni shunday qoldirmaydi deb o'ylayman.

Anvar Berdiev: “Biz har bir raqibga qarshi astoydil tayyorgarlik ko'ramiz”