Xususan, o'tgan yili Superligada to'purar bo'lishga intilgan Anvar Hojimirzaev ham ilk bor terma jamoa libosida to'p tepdi. Hujumchi bugundan "Dinamo" ixtiyoriga qaytdi va yangi mavsumga tayyorgarlikni davom ettirmoqda.

- O'zbekiston terma jamoasida birinchi marotaba mashg'ulot olib bordingiz va o'rtoqlik uchrashuvida maydonga tushdingiz. Bu qanday hissiyotlarni berdi?

- Terma jamoada o'ynash o'zgacha bo'ldi. Qaysidir manoda bosimni his qilar ekansiz. O'rtoqlik uchrashuvi bo'lsa ham katta masuliyat, boshqacha ishonch elkangizda turadi. Kirishib ketish qiyin bo'lgani yo'q. Ularning barchasi bilan aka-ukamiz.

- Yig'in davomida murabbiy o'zgarishini jamoa qanday qabul qildi?

- Albatta, kutilmagan holat bo'ldi deya olaman. Srechko Katanecni ham hali ko'rmagan edim. Timur aka bilan ishladik. Kim murabbiy bo'lsa ham maqsadimiz sari intilishda davom etishimiz kerak. Bu futbolda bo'lib turadigan holat.

- Terma jamoadagi yuklamalardan so'ng "Dinamo"ga moslashish qiyinchiliklar tug'dirmayaptimi?

- Bugun klub safiga qo'shildim. Bir kunlik xordiqdan so'ng chempionatga jiddiy tayyorgarlik olib boryapmiz. Maqsadimiz o'tgan yilgidan katta. Muxlislarni munosib natijalar bilan xursand qilishimiz kerak.

- Superligani ketma-ket ikkinchi yil "Navbahor"ga qarshi boshlaysizlar...

- O'tgan yili "Navbahor"ga 3:1 hisobida mag'lub bo'lgandik. Joriy mavsumni g'alaba bilan boshlashni istaymiz va buning uchun jamoamizda ishtiyoq ikki karra yuqori. Qurada kim tushishini ahamiyati yo'q edi. To'g'ri kelgani bilan o'ynaymiz.

- 2025 yilda nechta gol urmoqchisiz?

- 15 tadan kam gol urmoqchi emasman. Yilni to'purar sifatida yakunlashni xohlayman. 2024 yilda bu marraga ozgina etmay qolgandi.

Anvar Hojimirzaev: "Bu yil 15 tadan kam gol urmoqchi emasman"