Қорақалпоғистоннинг барча: "Арал", "Жайхун", "Арал академия", "Арал U-19", "Арал" аёллар жамоалари ўзининг уй учрашувларини Нукус шаҳридаги Қорақалпоғистон болалар-ўсмирлар футбол академиясига қараши майдонда ўтказиб келаётганди. Эндиликда Нукусда яна бир футбол майдони ишга тушиш арафасида турибди.

Нукус олимпия ва паралимпия спорт турларига тайёрлаш маркази ҳомийлар томонидан таъмирдан чиқарилди. Лига Қорақалпоғистон футбол ассоциацияси билан келишган ҳолда Пролиганинг 18-туридан ўрин олган Арал — Бухоро учрашувини мазкур футбол майдонида ташкил этиш устида ишламоқда. Талаб этилган барча ҳужжатлар Лигага тақдим этилса, 18-сентябр куни Арал ўз рақибини Нукус олимпия ва паралимпия спорт турларига тайёрлаш марказида тест тариқасида қабул қилади. Бу ерда 1100 нафар ишқибоз учрашувни бевосита томоша қилиши учун шароит мавжуд.

Қорақалпоғистон футбол ассоциацияси марказ футбол майдонида кейинчалик амалга оширилиши лозим бўлган ишлар юзасидан Лигага кафолат хати киритган бўлиб, улар келгуси уй учрашувига қадар бартараф этилиши кўзда тутилган. Режага кўра, 16 октябрь куни Нукусга "Машъал" клуби ташриф буюриши лозим.

Айни вақтда Нукус шаҳрида Турон стадионини қайта жонлантириш устида иш кетмоқда. Бу ҳақда кейинроқ батафсил маълумот берилади.

"Арал" Про лиганинг 1 та учрашувини тест тариқасида янги стадионда ўтказади