- Ўйин ҳақида фикрингиз?
- Аввало узоқ кутилган Пролига старти билан табриклайман. Бугун оғир баҳсни ўтказдик ва қийинчилик билан ғалаба қозондик. "Олимпик Мобиуз" жамоасини яхши биламиз, охирги пайтларда Суперлигага чиқиш учун кураш олиб бормоқда. Таркиби ўзгарган бўлишига қарамай, яхши ва ёш жамоа деб ўйлайман. Бизга босим бўлишини кутгандик, шу боис жойи келганда узун тўп узатишлар орқали ўйнашга тўғри келди. Гарчи мазмунли футбол кўрсата олмаган бўлсак-да, йигитларга ҳаракат учун миннатдорчилик билдираман ва "Шўртан" мухлисларини дастлабки ғалаба билан табриклайман.
- Мавсум энди бошланди. Лекин биринчи ўйиндаёқ аксар футболчиларда томир тортиб қолиши каби ҳолатлар кўринди. Бу нима билан боғлиқ?
- Ўзимизнинг майдонда машғулот ўтказа олмадик, чунки "Машъал" - "Локомотив" учрашувидан сўнг майдонни бошқатдан тўғрилашга тўғри келди. Натижада қаттиқ майдонда шуғулландик. Буни биринчи омил деб ҳисоблайман. Бугун кўпроқ тўпсиз ҳаракат қилдик, чунки рақиб шунга мажбур қилди. Томир тортишиб қолиши ёш ёки жисмоний ҳолат билан боғлиқ бўлиши мумкин. Буни ўрганиб чиқамиз.
- Бугунги учрашувга майдон қанчалик тайёр эди?
- Суперлига ўйинидан кейин қисқа фурсат ичида майдон шу даражага келтирилди ва бунинг учун раҳмат айтса арзийди. Пролигада бўлганимиз учун майдон ҳолатидан нолиш нотўғри деб ўйлайман. Муҳими тўп юрди, майдон ҳолати бугун ҳеч кимга халақит бермади.
- Баҳром Абдураҳимов жароҳат сабаб мажбурий алмаштирилди. Унинг ҳолати қандай?
- Футболчимизда қўл шикастланиш ҳолати кузатилди ва қанча муддатга сафдан чиққанини шифокорлар хулосасидан сўнг биламиз. Унинг қўл суягида синиш аниқланди. Баҳромга соғлиқ тилаб қоламиз.
- Кот-Д'Ивуарлик футболчи нима сабабдан бошланғич таркибда тушмади?
- Унинг ҳолатидан келиб чиқиб шундай йўл тутдик. Футболчимизнинг жисмоний ҳолати асосий таркибда тушишга тайёр эмас. Машғулотларда у билан ишлаяпмиз. Ҳозирча оптимал формада эмас.
- Сизнингча, легионерлар бу мавсум қанчалик ишончни оқлайди?
- Биз қиммат легионерларни таклиф қилмаганмиз, чунки ҳозир легионерлар билан ишлаш осон эмас. Ўтган мавсум ўйнаган бир нечта футболчини сафимизда олиб қола олмадик, шу боис камроқ маош эвазига легионерларни таклиф этдик. Ўйлайманки, янги футболчилар мавсум давомида ўзларини кўрсатади. Легионерлар жамоага киришиб кетди ва энг муҳими уларда хоҳиш бор.
- Пролигада жамоалар сони 14тага етказилди. Жамоалар кўпайиши Лига савиясига салбий таъсир қилмайдими?
- Кўп жамоалар ёш, аммо иштиёқ баланд. Ёши катта футболчилар ўзини асраши мумкин, лекин ёшлар тўхтамайди, улар охиригача курашади. Ёшларда ўзларини кўрсатиш хусусияти юқори. Биринчи давра ўрталарига келиб жамоалар сони 14га етказилгани қанчалик наф берганини гапирса бўлади. Ҳозир стартда бир нима дейиш қийин.
- Агар "Шўртан" Суперлигага қайтса, ўтган йилги қайси хатоларни такрорламаслиги лозим бўлади?
- Шахсий фикрим, Пролигадан Суперлигага пойдевор билан чиқиш керак. Пролига кўп футболчилар учун амалиёт вазифасини ўтайди, лекин Суперлигага ким қанчалик тайёр буни вақт кўрсатади. Агар биз бу йил Суперлигага қайтиб, 70 фоиз футболчини сақлаб қолсак жамоамиз учун осон бўлади. Яна янги жамоа тузишга тўғри келса, бу қийин бўлади. Шунинг учун биринчи навбатда пойдевор керак. Олдимизга Суперлигага қайтиш вазифаси қўйилган ва бу борада иш олиб борамиз.
